რუსეთის პრეზიდენტმა ვლადიმირ პუტინმა აფხაზეთის დე ფაქტო რესპუბლიკის პრეზიდენტი რაულ ხაჯიმბა მოსკოვში, დიდ სამამულო ომში გამარჯვების 75-ე წლისთავთან დაკავშირებულ ღონისძიებებზე მიიწვია.

როგორც სააგენტო "აფსნიპრესი“ წერს, პუტინმა ხაჯიმბას გაუგზავნა წერილი, რომელშიც აღნიშნულია, რომ ღონისძიებები მოსკოვში 2020 წლის 9 მაისს გაიმართება.

მისი სიტყვებით, რუსეთში არასდროს დაივიწყებენ იმ დიდ მსხვერპლს, რომელიც მოძმე აფხაზეთმა ამ დიად გამარჯვებაში გაიღო.

"მნიშვნელოვანია, რომ მეგობრობის და ურთიერთდახმარების ტრადიცია, რომელიც მამებმა და ბაბუებმა დაგვიტოვეს, ჩვენს სახელმწიფოებს შორის დღესაც კონსტრუქციული თანამშრომლობის საფუძველია“, - ნათქვამია პუტინის მიერ ხაჯიმბასთვის გაგზავნილ მოსაწვევში.