ზუგდიდის სოფელ დარჩელის საბავშვო ბაღში უარყოფენ ბრალდებას, თითქოს პატარებს იატაკზე აძინებენ. ბაღის გამგე ინეზა ქობალია და აღმზრდელები, რომლებიც შეესწრნენ ვიდეოს გადაღების შემთხვევას, ამბობენ, რომ აქ ისინი ბავშვებს არ აძინებდნენ, რადგან შესაბამისი პირობები არ აქვთ. გამგის თქმით, აქ 4-5 წლის პატარები ჰყავთ და ეს ბაგა-ბაღი არ არის. მისივე მტკიცებით, ლეიბი იმიტომ ეფინათ იატაკზე, რომ ბავშვებს სახლობანა ეთამაშათ და არა სხვა მიზნით. განმარტავს - ამის შესახებ მშობლებიც ინფორმირებულები არიან, რასაც თავად მშობლებიც ადასტურებენ. ამბობენ, რომ იციან ახალი ბაღის მშენებლობის შესახებაც. 

მშობლებისვე თქმით, ძილის პირობების არქონის მიზეზით, პატარები სახლში ადრე მიჰყავთ. მათ აქვთ ეჭვი, რომ ვიდეო მიზანმიმართულად გადაიღეს, რადგან ვისაც სინამდვილეში დახმარება უნდოდა, ეს შეეძლო სხვანაირად ეთხოვა და არა ამ ფორმით. ისინი ერთხმად ამბობენ, რომ აღმზრდელებს ენდობიან და ბავშვებიც აქ ამიტომ დაჰყავთ.

აღმზრდელების ცნობით, მამაკაცი, რომელმაც ვიდეო გადაიღო, ნასვამ მდგომარეობაში იყო. ის ერთ-ერთი ბავშვის ბიძაა:

"უნდოდა ძმისშვილის წაყვანა, მაგრამ არ გავატანეთ, რადგან გაფრთხილებული ვართ ბებიისგან, რომ ხშირად სვამს და არ გავატანოთ".

სულ სკოლამდელ დაწესებულებაში 140 ბავშვია. 

ფრაქცია "ევროპული საქართველოს" თავმჯდომარე ბათლომე შელია გუშინ, 25 სექტემბერს გამოაქვეყნა დარჩელის საბავშვო ბაღის ვიდეო. მასალაში ჩანს, რომ პატარა ბავშვებს იატაკზე ძინავთ. მასალაში ისმის ხმა, რომ "აქ გადაღება არ შეიძლება". ვიდეო ერთ-ერთმა მშობელმა, თორნიკე ხარამიშვილმა გადაიღო.

მან "ლაივპრესს" უთხრა, რომ ასე სკოლამდელ დაწესებულებაში დიდი ხანია ხდება და პროტესტიც აღმზრდელებთან არაერთხელ გამოთქვა, თუმცა უშედეგოდ.