ზუგდიდის მაჟორიტარი დეპუტატი გამოდის ინიციატივით, 2020 ან 2021 წელი ბავშვთა წლად გამოაცხადონ. მერაბ ქვარაიამ ამის შესახებ რეგიონული პოლიტიკისა და თვითმმართველობის კომიტეტის სხდომაზე განაცხადა. მისი თქმით, კარგი იქნება, თუ მთელს ამ დროს დაუთმობენ ბავშვთა თემატიკას და იმ საჭიროებებს, რომელიც დღეს სკოლამდელ სააღმზრდელო დაწესებულებებს აქვთ.

დეპუტატისვე განმარტებით, კარგია, რომ მომავალი წლიდან ბაღის აღმზრდელებს ხელფასები ეზრდებათ, რადგან უმნიშვნელოვანესი სფეროა.

"ეს იმდენად ვრცელი, მნიშვნელოვანი და აქტუალური საკითხია, იქნებ ერთი წელი გამოვაცხადოთ ბავშვთა წლად, მაქსიმალურად მივმართოთ რესურსებიც აქეთ და იმდენად მნიშვნელოვანი რეფორმები ჩავატაროთ, რომ ამ საძირკველზე შემდეგ უკვე ყველაფერი მყარად აშენდეს", - აღნიშნა მერაბ ქვარაიამ.

დეპუტატის ინიციატივა მოიწონა რეგიონული განვითარებისა და ინფრასტრუქტურის მინისტრის მოადგილე ილია ბეგიაშვილმა. თქვა, რომ არ იცის ეს ინიციატივა რა ფორმას მიიღებს, თუმცა იდეას ეთანხმება. მანვე განმარტა, რომ სასურველია უფრო სწრაფად მოხდეს ელემენტარული ინფრასტრუქტურული პრობლემების მოგვარება.

ინფრასტრუქტურული პრობლემებია ზუგდიდის მუნიციპალიტეტის სკოლამდელ სააღმზრდელო დაწესებულებებში. მათ შორის უმრავლეს ბაღებში ბავშვებს ვერ აძინებენ. ამ თემაზე "ლაივპრესმა" გადაცემაც მოამზადა.