"ევროპული საქართველოს" დეპუტატი ლელა ქებურია დაინტერესდა, არის თუ არა სიახლე დადიანების მუზეუმის თანამშრომელთა ხელფასებთან დაკავშირებით. მან კითხვით პარლამენტში მყოფ ფინანსთა მინისტრ ივანე მაჭავარიანს მიმართა. ლელა ქებურიამ განმარტა, რომ მუზეუმის თანამშრომლებს ცოტა ხნის წინ ჰქონდათ გაფიცვა დაანონსებული, თუმცა შემდეგ ზუგდიდში ჩავიდნენ განათლების და კულტურის სამინისტროს წარმომადგენლები და დაჰპირდნენ ამ ადამიანებს პრობლემის გადაწყვეტას, იმას, რომ მომავალი წლის ბიუჯეტის პროექტში ეს სიახლე აისახებოდა.

"ამ წარმოდგენილ ვერსიაში არანაირი ცვლილება განათლების და კულტურის მიმართულებით არ იკითხება. ყოველ შემთხვევაში მე ვერ ამოვიკითხე. შესაძლებელია ჩაშლილ ვარიანტში უფრო იკითხებოდეს. ბატონო არჩილ (პარლამენტის თავმჯდომარეს), თქვენ დიდი გულშემატკივარი ხართ ზუგდიდის და ერთად დაველოდოთ პასუხს", - მიმართა პარლამენტის სპიკერს ლელა ქებურიამ.

ივანე მაჭავარიანის თქმით, ყველანი არიან არამარტო ზუგდიდის, არამედ მუზეუმების და თანამშრომელთა ქომაგები. იციან პრობლემის შესახებ. მათ შორის იცის პრემიერ-მინისტრმა გიორგი გახარიამ. მინისტრმა აღნიშნა, რომ საკითხზე ჰქონდათ დისკუსია და ყველაფერს მოიმოქმედებენ, რათა რაღაც რესურსი გამოძებნონ.

"კულტურის სფეროს წარმომადგენელთა გულისწყრომა მე ვიცი, როგორც მუზეუმებთან, ისე თეატრებთან დაკავშირებით. სამწუხაროდ ვერ მოვახერხეთ ამ წლის ბიუჯეტში. და მე გპიდებით, რომ ძალიან სერიოზულად განვიხილავთ დარჩენილ დღეებსა და კვირეებში და მგონია, რომ მოვიძიებთ, თუმცა ამ ეტაპზე არ შემიძლია კონკრეტული ციფრის თქმა. მაგრამ ვიცით და ვაღიარებთ, რომ პრობლემა არის", - განაცხადა მინისტრმა საპასუხოდ.

თავის მხრივ, ლელა ქებურიამ აღნიშნა - პრობლემის აღიარება უკვე წინგადადგმული ნაბიჯია, თუმცა არასწორად მიაჩნია თქმა, რომ თურვე ვერ მოიძებნა თანხა ამ უმნიშვნელოვანესი კულტურულ-ისტორიული ლოკაციისთვის და მათი თანამშრომლებისთვის, მაშინ, როცა მოიძებნა და 20 მილიონ ლარზე მეტი დაიხარჯა ხელისუფლების პიარსამსახურისთვის.

"ანუ, ბოტები და ტროლები გაცილებით მეტ ანაზღაურებას იღებენ სიცრუის და სიძულვილის გავრცელებაში, ვიდრე დადიანების მუზეუმის თანამშრომლები ვიზიტორთა მომსახურებაში. არასწორია ის, რომ ვერ მოიძებნა თანხები მუზეუმის თანამშრომელთა ხელფასების გასაზრდელად, სამაგიეროდ ბიუჯეტიდან თვითმმართველობის ააიპებ-ისთვის სუბსიდიის სახით გაიცა შარშან 429 მილიონი. "ოცნების" თვითმმართველობის მაღალჩინოსანთა ნათესავები და ოჯახის წევრები გაცილებით მეტ ხელფასს იღებენ არაფრის კეთებაში, ვიდრე ეს ადამიანები. ასევე არასწორია ის, რომ ვაიგივებთ ზუგდიდის მუზეუმს სხვა სახლ-მუზეუმებთან.მე არ ვაკნინებ რომელიმე მუზეუმის ან კულტურული დაწესებულების მნიშვნელობას. ეს უბრალოდ არის მუზეუმი არის კომპლექსი, ნიკოსეულ სასახლესთან და ბოტანიკურ ბაღთან ერთად", - განაცხადა დეპუტატმა.

დადიანების მუზეუმის თანამშრომლებმა დაანონსებული გაფიცვა კულტურის სამინისტროს წარმომადგენლებთან გამართული შეხვედრის შემდეგ გადაიფიქრეს. ისინი დაბალ ანაზღაურებას უჩივიან. მანამდე მათ საპროტესტო შეკრება გამართეს და პრემიერს და სამინისტროს შესაბამისი წერილიც გაუგზავნეს.