ზუგდიდის მუნიციპალიტეტის მერიასა და "გაეროს განვითარების პროგრამა საქართველოში" შორის საგრანტო ხელშეკრულება გაფორმდა. მერიისთვის საჭირო თანხმობას საკრებულოს დღევანდელ სხდომაზე დეპუტატებმა მხარი დაუჭრეს. კერძოდ, ფრანგული პარკის ტერიტორიაზე პავილიონები მოეწყობა, სადაც ტრადიციული რეწვის ნიმუშები, ერთი წლის განმავლობაში, ყოველ შაბათ-კვირას გამოიფინება. გრანტის მოცულობა 60 ათასი ლარია.

ადამიანის უფლებათა და იურიდიულ საკითხთა კომისიის თავმჯდომარე სანდრო სორდიამ "ლაივპრესს" უთხრა, რომ გამოცხადდება ტენდერი და პირობებიც განისაზღვრება. ამ ყველაფრის მიზანი, მისი განმარტებით, სამეწარმეო საქმინობის წახალისებასთან ერთად, ტრადიციული რეწვის დარგის პოპულარიზება იქნება. იმ პირებს, რომლებიც პავილიონში თავიანთი ნახელავის გამოფენას გადაწყვეტენ, სიმბოლური თანხის გადახდა მოუწევთ. თუკი პროექტი გაამართლებს და გაგრძელდება, მაშინ შესაძლოა ფართით იჯარით ისარგებლონ.

როგორ შეირჩევიან მოქალაქეები, ვინც გამოფენებში მიიღებს მონაწილეობას, ზუგდიდის მერიაში ჯერ არ აკონკრეტებენ. აქ "ლაივპრესს" უთხრეს, რომ უახლოეს მომავალში ეთნოკუთხესთან დაკავშირებით პრეზენტაციას გეგმავენ, სადაც ეს დეტალები გაცხადდება.