ზუგდიდის დადიანების ისტორიულ-არქიტექტურული მუზეუმის ეზოში ძველი ქაღალდები და ბილეთები ღია წესით დაწვეს. როგორც "ლაივპრესისთვის" მოწოდებულ ფოტოებში ჩანს, მაკულატურა ტომრებით მოიტანეს და ცეცხლი წაუკიდეს.

მუზეუმის დირექტორმა ლილი ბერაიამ გვითხრა, რომ წლის ბოლოს, როგორც ყველა დაწესებულებაში, მათთანაც განხორციელდა ინვენტარიზაცია. შედეგად კი, დარჩენილი იყო ძველი, კომუნისტების დროინდელი მასალები, მათ შორის ბილეთები, რომელიც სასახლეს ანაგვიანებდა.

"ამ ინვენტარიზაციის შედეგად დარჩენილი იყო ძველი, კომუნისტების დროინდელი მასალა, რომელიც არ გამოიყენება და რატომ უნდა იდოს? პირიქით, ანაგვიანებს ჩვენს ტერიტორიას და სასახლეს. ამიტომ, მისი განადგურება ხდება ასე - ორმო უნდა ამოვთხაროთ და იქ უნდა ჩავყაროთ. მისი გატანა სხვაგან, არავითარ შემთხვევაში არ შეიძლება. ახლა ამოთხრიან ორმოს და ყველაფერი ისე გაკეთდება, როგორც წესი და რიგია", - განმარტა ლილი ბერაიამ ჩვენთან საუბარში.

გარემოს დაცვის ზედამხედველობის დეპარტამენტში გვითხრეს, რომ ეზოში ღია წესით დაწვა აკრძალულია. ასეთ შემთხვევაში ფულადი ჯარიმა 200 ლარია. სანქციების დაწესებისას ფიზიკური და იურიდიული პირი, როგორც გვითხრეს, გამიჯნული არ არის.

"მწვანე ყუთების უამრავი კომპანიია, რომელიც იბარებს მაკულატურას. ან ჩვეულებრივ, მუნიციპალურ ნაგავსაყრელზე შეუძლიათ გადაყარონ", - აღნიშნეს დეპარტამენტში.