ქალთა დღესასწაულებისთვის ზუგდიდის მერიის მიერ ხორცსაკეპი მანქანების შეძენაზე ტენდერის გამოცხადებას გამოეხმაურნენ ქალთა უფლებადამცველები.

არასამთავრობო ორგანიზაცია „სამოქალაქო აქტივობისა და თანასწორობის ცენტრის“ ხელმძღვანელის, ციცინო შენგელიას განცხადებით, ქალებისთვის საჩუქრად ხორცსაკეპი მანქანების შეძენა მერიის მხრიდან სექსისტურია.

„ძალიან აღმაშფოთებელია და როგორც ქალისთვის, შეურაცხმყოფელია. დღეს, პროგრესის ეპოქაში ქალები კოსმოსურ ექსპედიციებში დავდივართ, პოლიტიკაში მოსვლა გვინდა, ვიბრძვით ჩვენი უფლებებისთვის და ამ დროს, ზუგდიდის მერია გვეუბნება ყველა აქტივისტ ქალს, ვინც ცდილობს, თავისი ადგილი დაიმკვიდროს, რომ არ გვაინტერესებ, ხორცსაკეპ მანქანას გიყიდი, კუხნაში დაჯექი, კოტლეტები და გუფთები გამიკეთეო. ეს აკნინებს მუნიციპალიტეტში მცხოვრები ქალების როლს, ფუნქციას და ადგილს საზოგადოებაში “, - ამბობს ციცინო შენგელია.

ქალთა დღისათვის ხორცსაკეპი მანქანების შეძენაზე ტენდერის გამოცხადება დისკრიმინაციულია „თანასწორობის მოძრაობის“ ზუგდიდის ოფისის კოორდინატორის ცაბუნია ვართაგავასთვისაც.

„ძალიან გაბრაზებული ვარ. ამით მერია ხელს უწყობს სტერეოტიპის - „კუხნაში ქალის“ გამყარებას, რაც ისედაც ძალიან დიდი პრობლემაა ქვეყანაში. შეიძლება მერიას არ ჰყავს გენდერის სპეციალისტი, მაგრამ მინიმალური ცოდნაა საჭირო, რომ ასეთი შეცდომა არ დაუშვა“, - ამბობს აქტივისტი.

ორგანიზაცია „თანაზიარის“ ხელმძღვანელმა ხათუნა ბეჭვაიამ გვითხრა, რომ მერიის მიერ ქალებისთვის ხორცსაკეპი მანქანების საჩუქრად გადაცემა მისთვის მისაღებია მხოლოდ იმ შემთხვევაში, თუ მანამდე ჩატარდა მოკვლევა და გამოვლინდა ქალთა ჯგუფი ამ საჭიროებით.

მერიის მიერ გამოცხადებულ ტენდერში, დისკრიმინაციის გარდა უფლებადამცველები სხვა ხარვეზებსაც ხედავენ.

ცაბუნია ვართაგავა ამბობს, რომ მისთვის გაუგებარია “წარმატებული ქალების“ შერჩევის პროცედურა.

ციცინო შენგელია კი ფიქრობს, რომ იმ ქალების შერჩევაში, ვისთვისაც მერია ხორცსაკეპი მანქანების გადაცემას აპირებს, არცერთმა ორგანიზაციამ არ უნდა მიიღოს მონაწილეობა.

„მერია ამბობს, არასამთავრობო ორგანიზაციები წარადგნენ წარმატებულ ქალებსო. ეს ერთის მხრივ ქალების დაცინვაა და მეორეს მხრივ, არასამთავრობოების მუშაობის გაუფასურება. როგორ უნდა შეუწყოს ხელი თავმოყვარე ორგანიზაციამ იმას, რომ ქალთა დღესასწაულებისთვის თვითმმართველობა არიგებდეს ხორცსაკეპებს და ბლენდერებს“, - ამბობს ციცინო შენგელია.

„ლაივპრესი“ დაუკავშირდა ზუგდიდში მოქმედ რამდენიმე არასამთავრობო ორგანიზაციას. მათ გვითხრეს, რომ „წარმატებული ქალების შესარჩევად“ მათ მერიიდან არავინ დაკავშირებიათ.

მერიის განათლების, ძეგლთა დაცვის, კულტურის, სპორტისა და ახალგაზრდულ საქმეთა სამსახურმა ტენდერი გამოაცხადა. სატენდერო დოკუმენტაციის მიხედვით, ქალთა და დედის დღისადმი მიძღვნილი ღონისძიებისთვის, სასაჩუქრედ საოჯახო ელექტროტექნიკას შეიძენს. საუბარია 20 ხორცსაკეპ მანქანაზე.

ადგილობრივ ხელისუფლებაში "ლაივპრესს" განუმარტეს, რომ მერიისგან ოც, ადგილზე მოქმედ სხვადასხვა ორგანიზაციას გაეგზავნება წერილი, ისინი კი თავის მხრივ, თითო ადამიანს წარმოადგენენ. ტექნიკას სწორედ მათ გადასცემს მერია.