ზუგდიდის რაიონულმა სასამართლომ ხელახლა იმსჯელა სოფელ შამგონაში,

ახალგაზრდა ქალის გარდაცვალების საქმეზე დაკავებული მისი ქმრის, ბაკურ სორდიასთვის აღმკვეთის ღონისძიების შეფარდებაზე. პროკურორმა ანა არონიამ აღნიშნა, რომ კვლავ რჩება გამოძიებისთვის ხელისშეშლის და მიმალვის საფრთხე, ამიტომ მან დაკავებულისთვის ისევ პატიმრობა მოითხოვა.

 

თავის მხრივ, აღმკვეთის გადახედვა არ მოუთხოვია ბაკურ სორდიას.

სასამართლო დაეთანხმა პროკურორის მოსაზრებებას და ბრალდებული პატიმრობაში დატოვა.

მანამდე, სხდომათა დარბაზი გარდაცვლილი ქალის მამამ საკუთარი სურვილით დატოვა. ეს მას შემდეგ, რაც ბაკურ სორდია შემოიყვანეს. გასვლამდე დაკავებულს მიმართა რეპლიკით, რომ შვილი მოუკლა.

მოსამართლე ნატრული აკობიას კითხვის პასუხად, მიიჩნევს თუ არა თავს დამნაშავედ, აღნიშნა - ნაწილობრივ. ბრალდებულმა ადვოკატის დანიშვნა მოითხოვა. მოსამართლემ განუმარტა, რომ ის არ არის სოციალურად დაუცველი და სახელმწიფო არ არის ვალდებული უზრუნველყოს ადვოკატის მომსახურება.

სხდომის დასრულების შემდეგ, გარდაცვლილის ნათესავები დაუპირისპირდნენ ბაკურ სორდიას ახლობლებს. უთხრეს, რომ ისინი არ უნდა ესწრებოდნენ და ვერ უნდა გაბედონ "მკვლელის" მხარდასაჭერად მოსვლა. პროკურორმა ანა არონიამ ჟურნალისტების კითხვის პასუხად, თუ რა დასკვნა დადო ექსპერტიზამ ეკა მიქავას გარდაცვალების მიზეზთან დაკავშირებით, აღნიშნა, რომ სხდომის მსვლელობისას ამ დეტალებს განიხილავენ. ამასთან, მისივე თქმით, სოფელ შამგონის მაჟორიტარი დეპუტატი ზაზა ხუბუა ამ ეტაპზე კონკრეტულ საქმეში მხოლოდ დასაკითხ მოწმეთა სიაშია.

საქმის არსებითი განხილვა 18 თებერვალს ჩაინიშნა.

პროცესის პარარელურად, საპროტესტო აქციას მართავდნენ გარდაცვლილის ოჯახის წევრები და ახლობლები. მათ ხელთ ჰქონდათ პლაკატები, რომელზეც გაკრული იყო გარდაცვლილის სხეულზე დაზიანებების ამსახველი ფოტოები. პლაკატებზე ასევე ეწერა მათი სახელები, ვისაც მშობლები შვილის სიკვდილში ადანაშაულებენ.

29 დეკემბერს, სოფელ შამგონაში ახალგაზრდა ქალის ცხედარი სოფლის მაჟორიტარი დეპუტატის, ზაზა ხუბუას სახლის ეზოში, ბოსელში იპოვეს. 31 დეკემბერს, ცოლის თვითმკვლელობამდე მიყვანაში ბრალდებულ ქმარს სასამართლომ აღკვეთი ღონისძიების სახით, პატიმრობა შეუფარდა.