სახელმწიფო აუდიტის დასკვნის თანახმად, 2017-2018 წლებში ინფრასტრუქტურული პროექტების შესწავლით გამოვლინდა, რომ სამშენებლო სამუშაოების შესრულების პროცესი ყველა ეტაპზე ხასიათდება მნიშვნელოვანი სისტემური ხარვეზებით. კერძოდ, დარღვევები ფიქსირდება სამუშაოების დაგეგმვის, მიმწოდებელი სუბიექტების შერჩევა-შეფასების, სამუშაოების გეგმა-გრაფიკებისა და მიწოდების ვადების დაცვის, საჯარიმო სანქციების გავრცელებისა და ამოღების, შესრულებული სამუშაოების სისრულის, ანაზღაურების შესაბამისობისა და ხარისხის უზრუნველყოფის მიმართულებებით. შედეგად, როგორც აუდიტში განმარტავენ, მუნიციპალიტეტს მიადგა მნიშვნელოვანი ზიანი და მოსახლეობას დროულად და სრულად ვერ მიეწოდა ბიუჯეტით დაგეგმილი მატერიალური პროდუქტი.

ანგარიშში ვკითხულობთ, რომ ინფრასტრუქტურული პროექტების განხორციელებისათვის გაფორმებული 74 ხელშეკრულებიდან, ობიექტების მიწოდების ვადები გაზრდილია 30 ხელშეკრულებისათვის, რომელთა ჯამური ღირებულება 7,341.7 ათას ლარს შეადგენს.

„აღსანიშნავია, რომ 30 შემთხვევიდან, 16 ხელშეკრულების ფარგლებში მიმწოდებლებმა ვერც გაზრდილ ვადებში შეძლეს სამუშაოების დასრულება. ვადების ცვლილებების მიზეზებად, ძირითადად, დასახელებულია სახარჯთაღრიცხვო ხარვეზები, არახელსაყრელი კლიმატური პირობები და მდინარეების ადიდება. მოსალოდნელი რთული კლიმატური პირობებისა და საშუალო სტატისტიკური ნალექიანი ამინდების შესახებ ხელშეკრულების გაფორმების მომენტისათვის ცნობილი იყო როგორც შემსყიდველის, ასევე მიმწოდებლისათვის. ამდენად, ეს ფაქტი არ უნდა გამხდარიყო ცვლილების საფუძველი. ამასთანავე, რიგ შემთხვევებში, შესასრულებელი სამუშაოების არაარსებითი ცვლილება გამოყენებულია ვადების მნიშვნელოვანი გაზრდისათვის. შესაბამისად, მიმწოდებლებისათვის სამუშაოების დასრულების ვადები, ძირითადად, გაზრდილია დაუსაბუთებლად, სავარაუდოდ, იმ მიზნით, რომ არ მომხდარიყო მიმწოდებლის დაჯარიმება“, - ნათქვამია აუდიტის ანგარიშში.

აუდიტში განმარტავენ, რომ მუნიციპალიტეტის პასუხისმგებელმა პირებმა ჩაიბარეს ისეთი სამუშაოები, რომლებიც არ იყო შესრულებული ხელშეკრულებების პირობების შესაბამისად. გარდა ამისა, ზოგიერთი ობიექტი უფუნქციოა. აღნიშნულის შედეგად, მუნიციპალიტეტის, როგორც შემსყიდველი ორგანიზაციის პირობები გაუარესებულია.