ზუგდიდის რაიონულმა სასამართლომ ლომბარდის ძარცვის მცდელობის ფაქტზე დაკავებულებს ლევან სანაიას, გიორგი ნანავას და თემურ გუნიას აღკვეთის ღონისძიების სახით, წინასწარი პატიმრობა მიუსაჯა.

მოსამართლე შოთა ბიჭიას გადაწყვეტილების გასაჩივრებას აპირებს ლევან სანაიას ადვოკატი იოსებ ჯანაშია.

„დაცვის შემდეგი გეგმები იქნება, რომ კონკრეტულად აღნიშნული განჩინება გავასაჩივროთ სააპელაციო წესით და შემდეგ უკვე მოვემზადოთ მთავარი სხდომისთვის. ეს არის საფუძვლიანი საქმე რომ დაცვამ მოიგოს. ბრალდების მხარეს აქვს მხოლოდ დაზარალებულების ჩვენება, რომელიც ერთი ოჯახის წევრები არიან. საქმეში არ არსებობს ლომბარის სათვალთვალო კამერების ჩანაწერიც, რომელიც საფუძვლიან ეჭვს აჩენს, რომ ძარცვის მცდელობას ადგილი არ ჰქონია“, - აცხადებს ადვოკატი.

დაკავებულები თავს დამნაშავედ არ ცნობენ. ისინი ამბობენ, რომ ლომბარდში მხოლოდ ტელეფონის შეძენა სურდათ.

დაკავებულთაგან ერთ-ერთი, თემურ გუნია სოხუმის მცხოვრებია. სხდომაზე ითქვა, რომ თემურ გუნია ზუგდიდში ყოველდღე ჩამოდის სოხუმიდან, რადგან მეთადონით ჩანაცვლებითი თერაპიის პროგრამის ბენეფიციარია.

ის არ ფლობს ქართულ ენას, ლომბარდის თანამშრომლებმა კი რუსული არ იცოდნენ, ამიტომაც მან ლევან სანაიას სთხოვა დახმარებოდა და მისი საუბარი ქართულად ეთარგმნა.

„ვათვალიერებდით ტელეფონს, რომელიც გვითხრეს, რომ 1000 ლარი ღირდა. ვიკითხეთ, იყო თუ არა ნამდვილად ახალი, გვითხრეს, სუს-ის უფროსის არისო, ვთხოვეთ მეპატრონეს რომ დაერეკა ტელეფონის მფლობელისთვის და ეთხოვა 100 ლარი მაინც დაეკლო, ერთ-ერთმა დარეკა და თქვა, რომ ტელეფონს ფასი არ დააკლდებაო, ჩვენ ვიკითხეთ, რომ თუ ტელეფონი ახალი იყო რატომ იდო ცალკე, მათ როგორ გველაპარეკბით, თქვენ არ იცით ჩვენ ვინა ვართო, დავდეთ უკან ტელეფონი, მე გამოვედი, რომ კონფლიქტს გავრიდებოდი და გარეთ გავედი“, - თქვა სხდომაზე ლევან სანაიამ.

დაცვის მხარემ მოსამართლეს მიმართა გაეთვალისწინებინა დაკავებულის თემურ გუნიას და გიორგი ნანავას ჯანმრთელობის მდგომარეობა. ასევე ის ფაქტი, რომ სანაიას მიმალვა არ უცდია. დაცვამ სასამართლოს მიმართა წინადადებით, რომ გამოყენებულ იქნას პატიმრობის ნაცვლად გირაო, თუმცა პროკურორმა მარიამ ქორიძემ მოითხოვა პატიმრობა, ვინაიდან მისი მტიკიცებით, დაკავებულები ხშირად კვეთენ ადმინისტრაციულ საზღვარს და არსებობს არაკონტროლირებად ტერიტორიაზე მიმალვის საფრთხეები.

პროკურორის შუამდგომლობა დაკავებულების მიმართ, აღკვეთის ღონისძიების სახით პატიმრობის გამოყენების შესახებ, მოსამართლემ გაიზიარა.

სასამართლოს სხდომა 7 აპრილს დაინიშნა.

გამოძიება მიმდინარეობს საქართველოს სისხლის სამართლის კოდექსის 19 -178-ე მუხლის მეორე ნაწილის ა და ა ქვეპუნქტით გათვალისიწინებული დანაშაულებრივი ქმედება, რაც გულისხმობს ძარცვის მცდელობას, წინასწარ შეთანხმებით ჯგუფის მიერ, რამაც მნიშვნელოვანი ზიანი გამოიწვია.

რუსთაველის ქუჩაზე მდებარე ლომბარდში ინციდენტი 18 თებერვალს მოხდა. სამართალდამცავებმა ორი ახალგაზრდა მამაკაცი იმავე დღეს დააკავა. ინციდენტიდან მეორე დღეს, 19 თებერვალს პოლიციამ საკუთარ სახლთან დააკავა ლევან სანაია.