აუტისტური სპექტრის აშლილობის მქონე გიგი სიჭინავა დედასთან ერთად ზუგდიდის საკრებულოს სხდომას ესწრებოდა.

მოზარდის დედამ ნათია სახოკიამ განაცხადა, რომ მათ დღეს სურდათ კამპანია "არა ბულინგ"- ის შესახებ ესაუბრათ, თუმცა სხდომათა დარბაზში დეპუტატებს შორის სიტყვიერი დაპირისპირებით გამოწვეული ხმაურის გამო მან მოზარდი უნდა განარიდოს იქაურობას.

მოზარდმა კამპანიის ფარგლებში მისი ნახატით შექმნილი სტიკერები დაარიგა, თუმცა ვერ ისაუბრა, რადგან ზუგდიდის საკრებულოს სხდომა დღეს ოპოზიციამ ხმაურით დატოვა.

„მეგონა რომ დეპუტატები მშვიდად განიხილავდნენ საკითხებს, მაგრამ პიროვნულ შეურცხყოფებზე გადადიოდნენ. წამოვედით, იმიტომ რომ გიგი ძალიან დაითრგუნა. მოვუწოდებთ ყველას რომ მეტი პასუხისმგებლობით მოვეკიდოთ ნაკისრ ვალდებულებას. განსაკუთრებით საჯარო მოხელეებმა, რომლებიც ჩვენი არჩეულები არიან“, - განაცხადა მოზარდის დედამ ნათია სახოკიამ.

15 წლის გიგი სიჭინავამ დედასთან ერთად ბულინგის საწინააღმდეგო კამპანია წამოიწყო, რაშიც მხარს საგანმანათლებლო რესურცენტრი და ზუგდიდის მერია უჭერს. მოზარდი თანატოლებს მეტი სიყვარულისკენ და თანადგომისკენ საკუთარი ნახატით მოუწოდებს, რომელიც წებოვან სტიკერებზეა დატანილი.