ჩხოროწყუს საზოგადოებრივი ჯანდაცვის ცენტრის ხელმძღვანელის ინფორმაციით, სპორტსმენს, რომელსაც კორონავირუსი დაუდასტურდა, პირდაპირი კონტაქტი მუნიციპალიტეტთან არ ჰქონია.

ნინო ჯომიდავამ "ლაივპრესს" უთხრა, რომ ჯერ ჩაღრმავებული ეპიდკვლევის პასუხი ცნობილი არ არის, ამიტომაც, კაანტინში მომხდარის გამო არავინ გადაუყვანიათ.

"ამ პაციენტმა და მისმა ბიძაშვილმა თუ თანასოფლელმა, იმგზავრეს ერთად 27 მარტს თბილისიდან ზუგდიდამდე. სპორტსმენთან ერთად ვინც იმგზავრა, ის არის ჩხოროწყუელების სიძე. ამ სიძესთან სტუმრად იყვნენ ჩხოროწყუელები, ოთხი ადამიანი. გამოდის კონტაქტის კონტაქტი. მაგრამ ჯერ დასადგენია, იმ პიროვნებას, იმ სპორტსმენს რა დროს გამოუვლინდათ კლინიკური ნიშნები. ჩაღრმავებული კვლევით გაირკვევა, ინფიცირებულთან ვის ჰქონდა კონტაქტი. თუ საჭიროდ ჩათვლიან, გადაიყვანენ საავადმყოფოში და ლაბორატორიული კვლევა ჩაუტარდება", - გვითხრა ნინო ჯომიდავამ.

მისივე თქმით, დამატებით, თუ კიდევ ვისთან ჰქონდა კონტაქტი, ამ ყველაფერს პოლიცია არკვევს.

რაც შეეხება წალენჯიხას, ადგილობრივი საზოგადოებრივი ჯანდაცვის ცენტრის დირექტორის, თამარ კვარაცხელიას განცხადებით, პირს, რომელსაც კორონავირუსი დაუდგინდა, კონტაქტი დაახლოებით16 ადამიანთან ჰქონდა.

სახელმწიფო რწმუნებულის ალექსანდრე მოწერელიას ინფორმაციით, სპორტსმენს, რომელსაც კორონავირუსი დაუდასტურდა, 27 მარტს კონტაქტი ჰქონდა ზუგდიდში, წალენჯიხასა და ჩხოროწყუში.

საქართველოში კორონავირუსის 157 შეთხვევაა დადასტურებული.

28 გამოჯანმრთელდა.

გარდაიცვალა ერთი პაციენტი.