საქართველოს პრემიერ-მინისტრის განცხადებით, ფოთის პორტის ერთ ერთი ტერმინალის სრული რეკონსტრუქციის ეტაპი უახლოეს პერიოდში დაიწყება. გიორგი გახარიამ მთავრობის სხდომაზე აღნიშნა, რომ ინვესტიციებს ახორციელებს ამერიკული ფონდი.

„ეს პროექტი უკვე დაიწყო და გადმორიცხულია 30 მილიონი დოლარი. პროექტის სრული ღირებულება გახლავთ 93 მილიონი დოლარი. სამუშაოები დაიწყება უახლოეს დღეებში, ეს კიდევ ერთი დადასტურებაა, როგორც სახელმწიფოს ზრუნვის უცხოურ ინვესტიციებზე, ასევე, ჩვენი ქვეყნის სტრატეგიულ პარტნიორთან ურთიერთობის და თანამშრომლობის გაღრმავების, არა მხოლოდ უსაფრთხოების, ან დემოკრატიზაციის მიმართულებით, არამედ ეკონომიკური მიმართულებით და ამას ჩვენთვის ეკონომიკური შინაარსის გარდა აქვს სხვა დატვირთვაც“, - განაცხადა გიორგი გახარიამ.

მისი სიტყვებით, ჩვენ უნდა გავაძლიეროთ ჩვენი ინვესტიციები საპორტო ინფრასტრუქტურაში და ფოთის პორტი, როგორც ქვეყნის ერთ-ერთი ყველაზე მნიშვნელოვანი კარიბჭე კიდევ უფრო უნდა განვითარდეს.

პრემიერის განცხადებითვე, შავი ზღვისპირეთში საზღვაო ინფრასტრუქტურა და საპორტო ინფრასტრუქტურა უნდა იყოს თანამედროვე, განვითარებული და ხელი უნდა შევუწყოთ ყველაფერს, მათ შორის ახალი პორტების მშენებლობასაც.