ზუგდიდის რაიონულმა სასამართლომ, საკრებულოს წევრს და ფრაქცია "ევროპული საქართველოს" თავმჯდომარე ბათლომე შელიას, ასევე, მასთან ერთად ძალადობაში ბრალდებულ დათო ღურწკაიას გირაო შეუფარდა. ბათლომე შელიას 2 ათას ლარიანი გირაოს გადახდა დაეკისრა, დათო ღურწკაიას კი 1500 ლარის. მათ ამ თანხის გადახდის ვადად 40 დღე განესაზღვრათ.

სასამართლოს გადაწყვეტილებას ისინი არ გაასაჩივრებენ. ბათლომე შელიას თქმით, მათ არც მოუთხოვიათ, რომ პროკურატურის მოთხოვნა არ დაკმაყოფილებულიყო და გირაო არ დაკისრებოდათ.

"რადგან მოითხოვა პროკურატურამ, ზედმეტი ვაჭრობა არ დაგვიწყია. ისინი 3 ათას ლარს ითხოვდნენ, ჩვენ ჩვენი თანხა ვუთხარით. რადგან მათ მიაჩნდათ, რომ ეს იყო მნიშვნელოვანი მათთვის, ჩვენთვის მაგალითად უფრო მნიშვნელოვანი იყო, თუმცა ესეც არ იყო ძალიან გადამწყვეტი, რომ პროცესის გამართვის მაქსიმალური ვადა ვითხოვეთ. ამაზე დაგვთანხმდნენ", - უთხრა დეპუტატმა "ლაივპრესს" სასამართლო სხდომის დასრულების შემდეგ.

როგორ აფასებს სასამართლოს გადაწყვეტილებას, ბათლომე შელიას თქმით, ეს იყო ჩვეულებრივი გადაწყვეტილება, პროცედურული საკითხი ყველას მხრიდან, რომელიც ზედმეტად არც გასაპროტესტებლად არ ღირდა.

"ეს რომ ყოფილიყო ისეთი აღმკვეთის ღონისძიება, რომელიც მე ძალიან დამტვირთავდა, პრობლემებს შემიქმნიდა, ასეთი რამ არ ყოფილა. ამიტომ ჩვეულებრივ პროცედურას ჩვეულებრივ შევხედე მეც", - განმარტა დეპუტატმა.

საკრებულოს წევრს და წითელი ჯვრის მოხალისე დათო ღურწკაიას ბრალი ძალადობის მუხლით 25 მაისს წარუდგინეს. ბრალდების მხარის განმარტებით, ამ პირებმა ფიზიკური შეურაცხყოფა მიაყენეს სამოქალაქო აქტივისტ როსტომ ზარანდიას, რასაც თავად ზარანდიაც ადასტურებს.

საპირისპიროს ირწმუნება დეპუტატი, რომ ყველაფერი მის წინააღმდეგ, ხელისუფლებასთან შეთანხმებით დაგეგმა როსტომ ზარანდიამ. მიზანი კი ის არის, რომ ოპოზიციონერის მტკიცებით, წინასაარჩევნოდ რათა "პრესის ქვეშ" ჰყავდეთ.

თავის მხრივ, სამოქალაქო აქტივისტი დეპუტატს სდებს ბრალს პოლიტიკურ სპეკულაციაში და აცხადებს, რომ როგორც ჩანს, საკრებულოს წევრს სურს "ჩაგრულის მანტია მოისხას".