აფხაზეთის დე ფაქტო რესპუბლიკაში დანარჩენი საქართველოდან ჩასულ იმ მოქალაქეებს, რომლებიც უკვე გამოიკვლიეს, კორონავირუსი არ დაუდასტურდათ, - ინფორმაციას აფხაზური მედია მთავარ სანიტარულ ექიმზე ლუდმილა სკორიკზე დაყრდნობით ავრცელებს. მისი ცნობით, ამ დროისთვის ტესტირება ჩაუტარდა აფხაზეთში დაბრუნებულთა მხოლოდ ნაწილს, ზუსტი ციფრი არ დაუკონკრეტებია.

სკორიკის სიტყვებით, „სამშობლოში დაბრუნებულები“ თვითიზოლაციაში იმყოფებიან საკუთარ სახლებში, რაც ე.წ. სამართალდამცავების მიერ კონტროლდება. ის ირწმუნება, რომ თვითიზოლაციის დარღვევის ფაქტი ჯერ არ ყოფილა.

ჟურნალისტებთან საუბრისას ლუდმილა სკორიკმა შეაფასა ოკუპირებულ რეგიონში არსებული ეპიდემიოლოგიური ვითრება.

„მოლოდინები კეთილსაიმედოა. ანუ გუდაუთის საავადმყოფოში მიმდინარეობს კორონავირუსისგან გამოჯანმრთელებული პაციენტების გაწერის პროცესი. საავადმყოფოში რჩება მხოლოდ 3 პაციენტი. ვფიქრობ, რომ ისინიც ასევე გაეწერებიან. თუ ამ გზით ვიარეთ, ყველაფერი შესანიშნავად იქნება“, - განაცხადა სკორიკმა.

მან მოქალაქებს საზოგადოებრივი თავშეყრის ადგილებში ყოფნისგან თავის არიდებისკენ და რეკომენდაციების დაცვისკენ მოუწოდა.

ენგურის ხიდზე გადაადგილება დე ფაქტო მთავრობამ პანდემიის გამო 14 მარტიდან აკრძალა. 26 მაისს კი ცალმხრივად გახსნა. ოკუპირებულ ტერიტორიაზე დაბრუნების უფლება მიეცათ დანარჩენ საქართველოში მყოფებს. პირიქით, აფხაზეთიდან სამეგრელოს მიმართულებით გადაადილება კი კვლავ აკრძალული იყო. 1 ივნისს, სამუშაო დღის ბოლოს კი ხიდი ისევ ჩაკეტეს. ეს ინფორაცია მანამდე აფხაზურმა მედიამაც გაავრცელა.

მედიის ინფორმაციით, „საქართველოსთან საზღვარი“ 26 მაისიდან ცალმხრივად გაიხსნა იმ მიზნით, რომ „საკუთარ ქვეყანაში“ დაბრუნებულიყვნენ მოქალაქეები, რომლებმაც ეს მანამდე კარანტინის გამო ვერ შეძლეს. მათი ცნობით, ერთი კვირის განმავლობაში დანარჩენი საქართველოდან აფხაზეთში 532 ადამიანი დაბრუნდა.