ზუგდიდის საკრებულოს სხდომაზე ინციდენტი მოხდა. ბიზნესმენი მანანა მიქავა, რომელიც უკვე წლებია პრეტენზიას აცხადებს გულუას პარკის მიმდებარე ტერიტორიაზე, ადგილობრივი ხელისუფლების წარმომადგენლებს დაუპირისპირდა. მას შემდეგ, რაც დღის წესრიგით გათვალისწინებული მეორე საკითხის განხილვაზე უნდა გადასულიყვნენ, მანანა მიქავამ დეპუტატებს ამის საშუალება არ მისცა. მან საკრებულოს თავმჯდომარე მამუკა წოწერიას სიტყვიერი შეურაცხყოფა მიაყენა, "ნაგავი" უწოდა და უთხრა, რომ მისი მიწის მითვისების საქმეში წოწერიას პირად დაინტერესებას ხედავს. მოქალაქე შეეცადა საკრებულოს თავმჯდომარისთვის წყალიც შეესხა.

ბრალდებები თავად მამუკა წოწერიამ უარყო. განმარტა, რომ ბიზნესმენს ჰქონდა შესაძლებლობა, საკუთარი სიმართლე სასამართლოში დაემტკიცებინა და მოუწოდა, პატივი ეცა სასამართლოს გადაწყვეტილებისთვის. მანვე აღნიშნა, რომ ყველას შეუძლია საჯარო რეესტრში გადაამოწმოს, ვინ არის მიწის მესაკუთრე. მამუკა წოწერიასვე თქმით, დღეს ამ მიწის გასხვისების საკითხის განხილვა საკრებულოში არ არის დაგგმილი.

სხდომის მიმდინარეობისას დაცვის პოლიცია შემოვიდა, რომელიც შეეცადა მოქალაქე დარბაზიდან გაეყვანა, მაგრამ ის გაუძალიანდა. ხელმეორედ მისი გაყვანა უკვე სამართალდამცველებს აღარ უცდიათ.

"მე ჩემი მიწის 8576 კვადრატული მეტრიდან მერიას დავუთმე 4000 კვადრატული მეტრი. იმიტომ, რომ მქონდა პრობლემები და დანარჩენი რაც არის, ის უნდა დაებრუნებინათ და უნდა დამეწყო მშენებლობა. დღეს გავიგე, რომ ის 4000 კვადრატული რაც არის, გააქვთ გასაყიდად და ჩემი რჩება ისე. ვიცი, რომ ამ 4000 კვადრატულ მეტრს წაიღებენ და ამას ისევ სადავოდ გამიხდიან. ამიტომ, დღეიდან ვითხოვ მთლიან გაერთიანებას ამ მიწების. ერთ მტკაველს არ ვუთმობ არავის", - უთხრა მანანა მიქავამ ჟურნალისტებს.

ბიზნესმენისვე ცნობით, ხელთ აქვს ორი სასამართლოს გადაწყვეტილება, რომელიც არ შესრულდა, და რომელიც მის სასარგებლოდ იყო გამოტანილი.

ბიზნესმენის ადვოკატმა ნანა ფირცხალავამ აღნიშნა, რომ სასამართლო დავა მოცემულ საქმეზე გრძელდება, გასაჩივრებული აქვთ წინა სასამართლოს გადაწყვეტილება. ამის შესახებ კი ადგილობრივი ხელისუფლება ინფორმირებულია. მიუხედავად ამისა, მათ საკითხი მიწის გასხვისების, მაინც გააქვთ სხდომაზე.

უფლებადამცველისვე ცნობით, მუნიციპალიტეტის მერი, გიორგი შენგელია შეეცადა მიწასთან დაკავშირებით უკანონოდ მორიგებოდა მისი დაცვის ქვეშ მყოფს. ამასთან, სთხოვა დავის შეწყვეტაც.

ნანა ფირცხალავა ამბობს, რომ რეალურად თავის დროზე, მამუკა წოწერიამ და ყოფილმა მერმა ლაშა გოგიამ შეთანხმებით მოახერხეს მიწის ნაწილის გასხვისება და დღესაც იგივე მცდელობაა. მათ, ადვკატის განმარტებთ, ეს ინფორმაცია მიიღეს და აქ მოსვლის გადაწყვეტილებაც ამიტომ მიიღეს, რომ უფლება არ მისცენ.

სხდომა გრძელდება. საკრებულოში პოლიციაა მობილიზებული.

მიწის ნაკვეთი ე.წ. გულუას პარკის ტერიტორიაა და ის წლებია დავის საგანია შპს "აკვაპარკს" და ადგილობრივ ხელისუფლებას შორის. მიწა მანანა მიქავამ 2008 წელს შეიძინა.

ზუგდიდის სასამართლომ არ დააკმაყოფილა ადგილობრივი მერიის სარჩელი შპს "აკვაპარკის" წინააღმდეგ და კომპანიის წარმომადგენელ მანანა მიქავას არ დააკისრა 3 მილიონ 730 ათასი ლარის ოდენობით პირგასამტეხლო. ადგილობრივი ხელისუფლება მას შეუსრულებელ ვალდებულებებს ედავებოდა.

ამ მიწის დაბრუნების მოთხოვნით ბიზნესმენმა საპროტესტო აქცია არაერთხელ გამართა.