სახელმწიფო უსაფრთხოების სამსახური მორიგ განცხადებას ავრცელებს თბილისში რუსეთის მოქალაქის დაკავებაზე. მათი თქმით, 15 ივნისს განაცხადეს რუსეთის ფედერაციის მოქალაქის, ვასამბეკ ბოკოვის ბრალდების საქმესთან დაკავშირებით, რა დროსაც, გაახმოვანეს მხოლოდ ის ინფორმაცია, რაც მნიშვნელოვნად და აუცილებლად მიიჩნიეს საზოგადოების სწორი ინფორმირებისთვის და არ დატოვებდა სივრცეს მანიპულირებისთვის.

"ხსენებულ განცხადებაში, ჩვენ ცალსახად მივუთითეთ, რომ საქმეზე მიმდინარეობს ინტენსიური გამოძიება და ნებისმიერი სახის ინფორმაციის - ნამდვილის თუ ყალბის - გავრცელებამ, შესაძლოა დააზიანოს მთავარი საჯარო ინტერესი - დადგინდეს საქმეზე ობიექტური ჭეშმარიტება, მხილებულ იქნას დანაშაულში ჩაბმული ყველა პირი და აღსრულდეს მათ მიმართ მართლმსაჯულება.

მიუხედავად ამისა, მასმედიის საშუალებებში თემის განხილვის დროს, რიგ შემთხვევებში, კეთდება ისეთი სახის უპასუხისმგებლო განცხადებები, რომლებიც არც ფაქტობრივ გარემოებებზეა დაფუძნებული და რაც ყველაზე შემაშფოთებელია, აზიანებს გამოძიების ინტერესებს.

უნდა გავითვალისწინოთ, რომ ამ ურთულეს სისხლის სამართლის საქმეზე პრაქტიკულად უწყვეტ რეჟიმში ტარდება სხვადასხვა სახის საგამოძიებო მოქმედებები, იკრიბება და ფასდება მტკიცებულებები და სკურპულოზურ ანალიზზე დაყრდნობით იგეგმება ყოველი შემდგომი ნაბიჯი, რათა არც ერთი ვერსია და ფაქტობრივი გარემოება არ დარჩეს გამოძიების ჯეროვანი ყურადღების მიღმა.

ამ პროცესში ერთი შეხედვით უმნიშვნელო დეტალსაც შეიძლება ჰქონდეს გადამწყვეტი მნიშვნელობა, რის გამოც კიდევ ერთხელ მოვუწოდებთ ყველას, თავი შეიკავონ სისხლის სამართლის საქმის გარემოებების საჯარო განხილვისაგან, რათა ხელი არ შეეშალოს ინტენსიურად მიმდინარე საგამოძიებო პროცესს.

ამასთან, გვსურს ცალსახად აღვნიშნოთ, რომ გამოვთქვამთ მზადყოფნას, კანონით დადგენილი წესისა და პროცედურის დაცვით, ნებისმიერი პირისაგან მივიღოთ სისხლის სამართლის საქმესთან დაკავშირებული ინფორმაცია და მოვუწოდებთ საზოგადოებას, ითანამშრომლონ გამოძიებასთან", - ნათქვამია სუსის განცხადებაში.

მანამდე, არასამთავრობოებმა მოუწოდეს ხელისუფლებას, გამჭვირვალედ წარმართოს გამოძიება, უზრუნველყოს მასში მეგობარი ქვეყნების ექსპერტების ჩართულობა და სრული ინფორმაცია მიაწოდოს საზოგადოებას დაგეგმილი დანაშაულის შესახებ. ასევე, აქტიური ნაბიჯები გადადგას საქართველოს მოქალაქეების უსაფრთხოების უზრუნველსაყოფად.

"მთავარი არხის" ინფორმაციით, იგეგმებოდა ჟურნალისტ გიორგი გაბუნიას მკვლელობა, რომელიც ჩეჩნეთის ლიდერმა რამზან კადიროვმა დაუკვეთა. ტელეკომპანიის ცნობით, სწორედ თბილისში სპეცოპერაციისას დაკავებული რუსეთის მოქალაქე გეგმავდა დავალების შესრულებას.

თავად კადიროვმა და რუსეთის პრეზიდენტის პრესმდივანმა დიმიტრი პესკოვმა ბრალდებას აბსურდული უწოდეს. 

სახელმწიფო უსაფრთხოების სამსახურმა შეკვეთილი მკვლელობის ბრალდებით ერთი პირის დაკავება დაადასტურა, თუმცა არ დაუკონკრეტებია, ვის მკვლელობაზე არის საუბარი.

2019 წლის 7 ივლისს გიორგი გაბუნიამ ჯერ კიდევ სამაუწყებლო კომპანია "რუსთავი 2-ის" გადაცემა "პოსტსკრიპტუმში" რუსეთის პრეზიდენტ ვლადიმირ პუტინს რუსულად აგინა.