რუხის საავადმყოფოს კლინიკური დირექტორის განცხადებით, რჩება შთაბეჭდილება, რომ ზუგდიდში ახლადგამოვლენილ კოვიდინფიცირებულ პაციენტს გადატანილი აქვს ინფექცია და სუსტად დადებითი პასუხიც შესაძლოა სწორედ ამ ფაზისთვის იყოს დამახასიათებელი.

ნიკოლოზ ქარცივაძის განმარტებით, არცერთი მონაცემი არ ადასტურებს, რომ მამაკაცს ვირუსის მწვავე ფორმა აქვს. თუმცა უნდა დაელოდონ ლუგარის ლაბორატორიაში გაგზავნილი სისხლის ნიმუშზე ამომწურავ ინფორმაციას. ის ფიქრობს, რომ პანიკის საფუძველი არ არსებობს, რადგან ჯერჯერობით გრძელდება ინფიცირებულის ღრმა კვლევა.

"ახალი პაციენტის პისიარ პასუხი არის დადებითი. ის ითვლება კოვიდინფიცირებულად და იმყოფება ჩვენს კლინიკაში. მისი პრეისტორია ასე გამოიყურება. რამდენიმე დღის წინ იყო რუსეთის საზღვრის კვეთა. განისაზღვრა საკარანტინო ზონაში პისიარი, სადაც იყო უარყოფითი შედეგი. შემდეგ მას ჰქონდა ვიზიტი ოჯახის წევრის გარდაცვალებასთან დაკავშირებით ზუგდიდში. ჩატარდა აქ ადგილზე ეპიდემიოლოგიური სამსახურის მიერ ანტისხეულების და ანტიგენების სწრაფი ტესტი, ანტისხეულების პასუხები მივიღეთ დადებითი, მოთავსდა ჩვენს კლინიკაში. გადამოწმდა პისიარით, რომელზეც მიღებულია სუსტად დადებითი პასუხი", - აღნიშნა ნიკოლოზ ქარცივაძემ.

რუხის კლინიკაში სულ 8 პაციენტი რჩება. მათგან 5 კოვიდინფიცირებულია. ყველას მდგომარეობა დამაკმაყოფილებელია. 4 პაციენტის განმეორებითი შუალედური კვლევა უახლოეს დღეებში ჩატარდება.

70 წლის მამაკაცი საქართველოში ლარსის გავლით 12 ივნისს შემოვიდა. ის კარანტინში მოათავსეს, თუმცა ძმის სამძივრისთვის 14-ში, კორონავირუსზე უარყოფითი პასუხის შემდეგ გაათავისუფლეს. საზოგადოებრივი ჯანდაცვის ცენტრში ირწმუნებიან, რომ პაციენტი სამძიმარს დისტანციურად იღებდა და ახლო კონტაქტი არავისთან ჰქონია.