საქართველოს პარლამენტის წევრის "ქართული ოცნებიდან", ვიქტორ ჯაფარიძის და მისი შვილის, ოთარ ჯაფარიძის წილობრივ მფლობელობაში არსებული კომპანიები ტენდერებს იგებენ, - ნათქვამია კვლევაში, რომელსაც "საერთაშორისო გამჭვირვალობა - საქართველო" აქვეყნებს.

ორგანიზაციის თქმით, 2018 წლიდან დღემდე მიღებული კონტრაქტების ჯამური ღირებულება 6,264,688 ლარია.

გამოქვეყნებული ინფორმაციის მიხედვით, ვიქტორ ჯაფარიძე ფლობს შპს "სეტი+"- ის 33,3% წილს, რაც აღნიშნულია შარშან, დეკემბერში შევსებულ დეკლარაციაშიც. სახელმწიფო შესყიდვებში შპს "სეტი+" 2019 წლის ივლისიდან მონაწილეობს და 10 გამარტივებული შესყიდვა აქვს მიღებული, ჯამური ღირებულებით 57,762 ლარი.

"გამჭვირვალობის" ცნობით, მესტიის მერიამ, საქართველოს ტურიზმის ეროვნულმა ადმინისტრაციამ და სურსათის ეროვნულმა სააგენტომ შპს "სეტი+"-სგან სასტუმროს, რესტორნისა და კვების მომსახურება შეისყიდეს.

ვიქტორ ჯაფარიძის შვილის, ოთარ ჯაფარიძის კომპანიების ტენდერები

ოთარ ჯაფარიძე წილს შვიდ კომპანიაში ფლობს. მათ შორის არის შპს "ექსპერტ ჰაუსის" 24% წილის მფლობელი.

შპს "ექსპერტ ჰაუსი" 2017 წლიდან დღემდე 14 ტენდერში მონაწილეობდა და 6 შემთხვევაში გაიმარჯვა. ხელშეკრულებების ჯამური ღირებულება 2,571,006 ლარია.

კომპანიამ მშენებლობასთან დაკავშირებული და საინჟინრო მომსახურება თითოჯერ გაუწია ა(ა)იპ "რუსთავის კორპუსს" (2018 წ.), ხობის (2019 წ.), ბოლნისის (2019 წ.), ზუგდიდის (2020 წ.), ყვარლისა (2020 წ.) და ლაგოდეხის (2020 წ.) მუნიციპალიტეტებს.

ოთარ ჯაფარიძე ასევე არის შპს "ტობ კონსტრაქშენის" 50% წილის მესაკუთრე. 2018 წელს შპს სულ ორ ტენდერში მონაწილეობდა და ორივეჯერ უკონკურენტოდ გაიმარჯვა. ორივე შემთხვევაში შემსყიდველი "სახელმწიფო სამშენებლო კომპანია" იყო. ხელშეკრულების ჯამური ღირებულებამკი 3,635,920 ლარით განისაზღვრა. შესყიდვის საგანი იყო ქვიშა-ღორღი და ბეტონი.

სატენდერო დოკუმენტაციის მიხედვით, "სახელმწიფო სამშენებლო კომპანიას" მოთხოვნა იყო შემდეგი - მიმწოდებლის ქარხანა უნდა ყოფილიყო მესტიის მუნიციპალიტეტის სოფელი იფარიდან არაუმეტეს 30 კილომეტრის რადიუსში.

"აღსანიშნავია, რომ სწორედ ამ პერიოდში, "სახელმწიფო სამშენებლო კომპანია" ზუგდიდი - ჯვარი - მესტია - ლასდილის საავტომობილო გზის 165-177 კმ მონაკვეთის სარეაბილიტაციო სამუშაოებს ახორციელებდა, ეს სამუშაოები კი "საქართველოს საავტომობილო გზების დეპარტამენტის" ტენდერის ფარგლებში განხორციელდა, რომელშიც 2017 წლის დეკემბერში სწორედ "სახელმწიფო სამშენებლო კომპანიამ" გაიმარჯვა", - ვკითხულობთ კვლევაში.

პოლიტიკური შემოწირულობები

ორგანიზაციის თქმით, ვიქტორ ჯაფარიძე, მისი მეუღლე ნათია ხვისტანი და ვიქტორ ჯაფარიძის შვილის, ოთარ ჯაფარიძის ბიზნესპარტნიორები მსხვილი შემომწირველებიც არიან. მათ 2012 წლიდან დღემდე მმართველ პარტია "ქართულ ოცნება-დემოკრატიულ საქართველოს" ჯამში 360,000 ლარი, ხოლო 2018 წელს პრეზიდენტობის კანდიდატს, სალომე ზურაბიშვილს 50,000 ლარი შესწირეს:

ვიქტორ ჯაფარიძემ 2012-2017 წლებში ოთხჯერ, სულ 120,000 ლარი შესწირა პარტია "ქართულ ოცნება-დემოკრატიულ საქართველოს";

მისმა მეუღლემ, ნათია ხვისტანმა 2017 წელს 55,000 ლარი შესწირა "ქართულ ოცნებას", 2018 წელს კი - 50,000 ლარი პრეზიდენტობის კანდიდატ, სალომე ზურაბიშვილს;

ოთარ ჩართოლანმა - შპს "სეტი+"-ის 66.7% წილის მფლობელმა, 2014-2016 წლებში, ორჯერ, ჯამში 103,000 ლარი შესწირა "ქართულ ოცნებას". ის არის ნათია ხვისტანის და ოთარ ჯაფარიძის ბიზნესპარტნიორი კომპანიებში - შპს "სეტი" [50% წილი], შპს "ქცია 94" [20.99% წილი], შპს "დიდველი +" [10% წილი], შპს "ოთო" [33.3% წილი] და შპს "Aლლ სეასონს" [50% წილი.

კახაბერ გამისონიამ - შპს "ექსპერტ ჰაუსის" 51% წილის მფლობელმა და დირექტორმა - 2014 წელს 15,000 ლარი შესწირა "ქართულ ოცნებას";

მურად ჯობავამ - შპს "ექსპერტ ჰაუსის" 5% წილის მფლობელმა - 2014-2017 წლებში სამჯერ, ჯამში 47,000 ლარი.

ოთარ მაზმიშვილმა - შპს "თOB კონსტრაქშენის" დირექტორმა - 2017 წელს 20,000 ლარი შესწირა პარტია "ქართულ ოცნებას".

ხარვეზი ქონებრივ დეკლარაციაში

კვლევაში აღნიშნულია ისიც, რომ ვიქტორ ჯაფარიძეს საკუთარი და მეუღლის პოლიტიკური შემოწირულობების შესახებ ინფორმაცია დეკლარაციაში არც ერთხელ არ მიუთითებია. ეს იმ ფონზე, როცა "საჯარო დაწესებულებაში ინტერესთა შეუთავსებლობისა და კორუფციის შესახებ" კანონის თანახმად, თანამდებობის პირი ვალდებულია, დეკლარაციაში ასახოს ფულადი გასავალი, რომლის ოდენობაც აღემატება 5,000 ლარს.

"საერთაშორისო გამჭვირვალობა - საქართველო" მოუწოდებს სახელმწიფო უსაფრთხოების სამსახურის ანტიკორუფციულ სააგენტოს და გენერალურ პროკურატურას, შეისწავლონ ვიქტორ ჯაფარიძესთან და მის შვილთან დაკავშირებული კომპანიების თითოეული ტენდერი და დაადგინონ, ხომ არ იყო ისინი ზემოაღნიშნული შპს-ებისთვის სასურველ პირობებში გამოცხადებული და შეიცავს თუ არა კორუფციის შესაძლო ნიშნებს.

ორგანიზაცია ასევე მიმართავს საჯარო სამსახურის ბიუროს, შეისწავლოს ვიქტორ ჯაფარიძის ქონებრივი მდგომარეობის დეკლარაცია და მოახდინოს შესაბამისი რეაგირება.

ვიქტორ ჯაფარიძე 16 წელია საქართველოს პარლამენტის წევრია. ის ორჯერ იყო მესტიის მაჟორიტარი დეპუტატი, ბოლოს კი პარლამენტის წევრი "ქართული ოცნება-დემოკრატიული საქართველოს" პარტიული სიით გახდა.