შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის თანამშრომლებმა, სამგზავრო ავტობუსის და მასში მყოფი ერთ-ერთი მგზავრის ჯანმრთელობის დაზიანების ბრალდებით, მოქალაქე, 1974 წელს დაბადებული გ.ჯ. მოსამართლის განჩინებით დააკავეს.

კერძოდ, გამოძიებით დადგინდა, რომ ბრალდებულმა მიმდინარე წლის 6 აგვისტოს, ხობის მუნიციპალიტეტის სოფელ შუა ქვალონში, ზუგდიდი-თბილისის მარშრუტის სამგზავრო ავტობუსს ქვა ესროლა, რის შედეგადაც დაშავდა ერთი მგზავრი და დაზიანდა სატრანსპორტო საშუალების წინა საქარე მინა.

გამოძიება სისხლის სამართლის კოდექსის 187-ე მუხლის 1-ლი ნაწილით და 126-ე მუხლის 1-ლი ნაწილით მიმდინარეობს.

დანაშაული 3 წლამდე ვადით თავისუფლების აღკვეთას ითვალისწინებს.

ავტობუსს ქვა 9 ივლისსაც ესროლეს. მაშინ, მომხდარზე შინაგან საქმეთა სამინისტრომ გამოძიება საქართველოს სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.

თუმცა, კომპანიის დირექტორის, ვახტანგ კუტალიას თქმით, ავტობუსის დაზიანების პირველ შემთხვევაზე არავინ დაუკავებიათ. ის მომხდარს კონკურენციას უკავშირებს.

კომპანია "გლობუსის" ტრანსპორტმა 9 ივნისიდან დაიწყო ზუგდიდში მუშაობა.