„ერთიანმა ნაციონალურმა მოძრაობამ“ მაჟორიტარი დეპუტატობის კანდიდატები დაასახელა. ფოთში-ხობსა და სენაკში მაჟორიტარად იყრის კენჭს მურთაზ ზოდელავა, აბაშა-მარტვილი-ჩხოროწყუ-წალენჯიხაში კი როლანდ ფიფია.

ზუგდიდში პარტიამ კანდიდატად ექიმ-თერაპევტი, მალხაზ ჯალაღონია დაასახელა. კანდიდატების წარდგენა თბილისში, პარტიის ოფისში შედგა.

„როლანდმა და მისმა ჯგუფმა დიდი წვლილი შეიტანეს ქართული სპორტის და ტურიზმის განვითარებაში. ის ზრუნავდა და მომავალშიც იმუშავებს ქართული ეკონომიკის განვითარებაზე, რათა ჩვენი მოქალაქეებისთვის შეიქმნას სამუშაო ადგილები“, - განაცხადა როლანდ ფიფიას წარდგენისას პარტიის ერთ-ერთმა ლიდერმა ზაალ უდუმაშვილმა.

რაც შეეხება მურთაზ ზოდელავას, ის წარადგინა, როგორც კორუფციასა და კრიმინალთან მებრძოლი ადამიანი.

"ადამიანი, რომელმაც დიდი როლი ითამაშა ორგანიზებული დანაშაულის დამარცხებაში. ისეთი უსაფრთხო გარემოს შექმნაში, როცა მშობლებს არ ეშინიათ შვილების ქუჩაში გაშვება, როცა სკოლის მოსწავლეები იარაღით და დანებით არ დადიან, როცა მანქანებს ღიას ტოვებდნენ, როცა მოსახლეობა თავს კრიმინალებისგან დაცულად გრძნობდა", - განაცხადა მურთაზ ზოდელავაზე უდუმაშვილმა.

რაც შეეხება ზუგდიდის მაჟორიტარი დეპუტატობის კანდიდატს, მისი წარდგენისას პარტიის ლიდერმა თქვა, რომ მალხაზ ჯალაღონია არის ადამიანი, რომელიც ზუგდიდს 36 წელია ემსახურება. თავად კანდიდატი წარდგენას არ ესწრებოდა, რადგან კარანტინში იმყოფება, რომელსაც ზაალ უდუმაშვილის თქმით, რამდენიმე დღეში დატოვებს:

"ზუგდიდი ირჩევს ზუგდიდელს. ყველა ზუგდიდელისთვის პატივსაცემი პიროვნება, რომელიც 36 წელია ემსახურება ზუგდიდს. მიუხედავად იმისა, რომ მას არაერთი შემოთავაზება ჰქონდა შეერთებული შტატებიდან, რომ იქ გაეგრძელებინა სამედიცინო კარიერა, უარი თქვა დაეტოვებინა მშობლიური ქალაქი. იგი აქტიურად იყო ჩართული კოვიდის წინააღმდეგ ბრძოლაში და დღემდე განაგრძობს ამ ბრძოლას. ბატონი მალხაზი რამდენიმე წლის წინ "ნიუ-იორკ ტაიმსის" სამედიცინო კონკურსის გამარჯვებული გახდა, სადაც რამდენიმე ასეული ექიმი მონაწილეობდა მთელი მსოფლიოდან და მალხაზ ჯალაღონიამ ერთ-ერთმა პირველმა შეძლო დისტანციურად სწორი დიაგნოზის დასმა. ის ახლაც ჩვენი მოქალაქეების ჯანმრთელობისთვის იბრძვვის და მისი პროფესიიდან გამომდინარე ამ დროისთვის კარანტინში იმყოფება, რომელსაც ალბათ რამდენიმე დღეში დატოვებს", - განაცხადა ზაალ უდუმაშვილმა.

ამ დრომდე ზუგდიდის მაჟორიტარი დეპუტატობის კანდიდატად "ნაციონალური მოძრაობიდან" რამდენიმე პირი, მათ შორის ექსპრეზიდენტ მიხეილ სააკაშვილის დედა, გიული ალასანია განიხილებოდა. დიდი ალბათობით რომ სწორედ გიული ალასანიას დაასახელებდნენ, ამის შესახებ "ლაივპრესს" რამდენიმე დღის წინ პარტიის ერთ-ერთმა ლიდერმა კობა ნაყოფიამ განუცხადა.

მანამდე ზუგდიდის მაჟორიტარი დეპუტატობის კანდიდატები დაასახელა რამდენიმე პარტიამ. "ქართული ოცნებიდან" გამარჯვებისთვის ირაკლი ჩიქოვანი იბრძოლებს, "ევროპული საქართველოდან" გიგი უგულავა, "პატრიოტთა ალიანსიდან" ოთარ ჭითანავა, "თავისუფალი საქართველოდან" ზურაბ ჯინჯოლავა, "ჩვენი საქართველო-სოლიდარობის ალიანსიდან" ჯამბულ ნაჭყებია, "ქართული მარშიდან" გიორგი გაბედავა.

პარლამენტის არჩევნები 31 ოქტომბერს გაიმართება.