სვანეთში გაუჩინარებული მოზარდის, ილია ფილფანის ოჯახი შვილის სამძებრო სამუშაოებში დახმარებას საზოგადოებას სთხოვს და ფულად ჯილდოს აწესებს. მათ დღეს თბილისში გამართულ ბრიფინგზე განაცხადეს, რომ პირს რომელსაც აქვს ინფორმაცია 13 წლის ილია ფილფანის ადგილსამყოფელზე, რომელიც დადასტურდება, 50 ათას ლარს გადაუხდიან. ასევე ფულადი ჯილდო, 30 ათასი ლარია დაწესებული ინფორმაციისთვის, რომელიც მოზარდის პოვნაში დაეხმარებათ, ან იმ ადამიანების შესახებ ცნობის მიწოდებაში, ვინც შეიძლება რაიმე კავშირში იყოს ამ საქმესთან.

„გამოძიება განიხილავს ყველა შესაძლო ვერსიას და გამოცხადებულია საერთაშორისო ძებნა. განსაკუთრებული ყურადღება ეთმობა ზემო სვანეთს - ლენჯერს, ჯვარს და მესტიას, სადაც ბავშვი ბოლოს ნახეს“, - განუცხადა ჟურნალისტებს ილია ფილფანის დედამ, ქსენია ფილფანმა.

მისივე თქმით, ოჯახი იძლევა გარანტიას, რომ დაცული იქნება ინფორმაციის მიმწოდებლის კონფიდენციალურობა.

„ვცდილობთ ვისარგებლოთ ყველა შესაძლო საშუალებით რათა ვიპოვოთ ჩვენი შვილი, თუ არსებობს ერთი პროცენტი მაინც რომ საზღვარგარეთაა, გვინდა ეს შესაძლებლობაც გამოვიყენოთ“, - თქვა ქსენია ფილფანმა.

მესტიაში ოთხი თვის წინ დაკარგული 13 წლის ილია ფილფანს ინტერპოლი ყვითელი ცირკულარით ეძებს.

მოზარდის ახლობლებმა სოციალურ ქსელში 19 ივლისს გაავრცელეს ცნობა ბიჭის დაკარგვის შესახებ და მოქალაქეებს დახმარება სთხოვეს.

საქართველოს შინაგან საქმეთა სამინისტრო ილია ფილფანის გაუჩინარების საქმეს სისხლის სამართლის კოდექსის 143-ე მუხლის მესამე ნაწილის „დ“ ქვეპუნქტით იძიებს, რაც არასრულწლოვნის მიმართ წინასწარი შეცნობით თავისუფლების უკანანონო აღკვეთას გულისხმობს.