Covid-19-თან, ისევე როგორც სხვა ვირუსებთან ბრძოლაში განსაკუთრებული მნიშვნელობა ენიჭება იმუნური სისტემის გაძლიერებას. ამ თემაზე საუბარი ეპიდსიტუაციის გაუარესების პარალელურად კიდევ უფრო აქტუალური გახდა. ვრცელდება ცნობები, თითქოს Covid-19-ით ინფიცირების შემთხვევაში განსაკუთრებით სასარგებლოა ციტრუსის, ასევე ჯანჯაფილის და ნივრის მიღება. შეგხვდებათ მოსაზრებები, რომ ბანანი ხელს უწყობს სისხლის შესქელებას და ამიტომაც მისი მიღება არ არის რეკომენდირებული კორონავირუსით ინფიცირების შემთხვევაში, რათა ხელი არ შევუწყოთ თრომბოემბოლიის განვითარებას. რამდენად შეესაბამება ეს სიმართლეს და რა ოდენობით უნდა მივიღოთ ჩამოთვლილი პროდუქტები, ამ თემაზე ენდოკრინოლოგ ლაშა უჩავას ვესაუბრეთ.

მისი სიტყვებით, ახალი კორონავირუსის გავრცელების პირობებში ცხოვრების წესს, რომელშიც იგულისხმება: ჯანსაღი კვება, ფიზიკური აქტივობა და სწორი ძილი, ძალიან დიდი მნიშვნელობა ენიჭება. როგორც ენდოკრინოლოგი ამბობს, აღნიშნული რეკომენდაცია მოწოდებულია ჯანდაცვის მსოფლიო ორგანიზაციის მიერ.

„სწორი კვების პრინციპებში მოისაზრება ბალანსირებული რაციონალური კვება, რომლის პრინციპი გახლავთ ორგანიზმში შევიდეს ყველა სახის მიკრო-მაკრო ელემენტი, ვიტამინები, ცხიმები, ცილები და ნახშირწყლები. რაც შეეხება კონკრეტულად ციტრუსის მიღებას, რა თქმა უნდა ამ სეზონე მნიშვნელოვანია მისი მიღება, მასში არსებული C ვიტამინის გამო, თუმცა ყველა პროდუქტს დღის განმავლობაში აქვს მისი დოზირება. ხილი დღის რაციონში უნდა იყოს 0,5 კგ. შესაბამისად ციტრუსიც დღის განმავლობაში არ უნდა აღემატებოდეს ამ ნორმას...

ლიმნის მიღება აქტუალურია დღესდღეობით და რა თქმა უნდა ეს მოსაზრება (რომ ის ათხელებს სისხლს) აზრს მოკლებული არ არის. თუმცა აქვე უნდა ვიცოდეთ, რომ ეს არ არის სამკურნალო საშუალება, ეს არის პრევენციული ღონისძიება, როგორც იმუნური სისტემის მუშაობისთვის, ასევე სისხლის კოაგულაციისათვის (გათხელებისთვის), თუმცა ლიმნის დიდი რაოდენობით მიღებამ შეიძლება გამოიწვიოს კუჭის ლორწოვანის გაღიზიანება. ამიტომ დღის განმავლობაში მისი რაოდენობა არის 1 ც. ასევე უნდა გავითვალისწინოთ მიღების წესი - უმჯობესია 1 ც ლიმონი ჩავწუროთ 1,5-2 ლიტრ წყალში და სწორედ ეს წყალი უნდა მივიღოთ დღის განმავლობაში“, - ამბობს „ლაივპრესთან“ საუბარში ლაშა უჩავა.

ენდოკრინოლოგი ადასტურებს ინფორმაციას, რომ ასევე სასარგებლოა იმუნიტეტისთვის ჯანჯაფილის, ლიმნის და წყლის კომბინაცია. ლაშა უჩავას სიტყვებით, ეს ნაზავი ხელს უწყობს წონის კორექციასაც, რაც ასევე მნიშვნელოვანია პანდემიიის პირობებში, რადგან ჭარბი წონა და სიმსუქნე ერთ-ერთი მაღალი რისკ ფაქტორია ინფიცირების დროს.

რაც შეეხება გვრცელებულ ცნობებს ბანანის მავნებლობაზე, ლაშა უჩავას სიტყვებით, ბანანში არსებული შაქრის შემცველობა ხელს უწყობს სისხლის შედედების ფაქტორს და სისხლი ხდება უფრო მეტად ბლანტი, მაგრამ მისივე სიტყვებით, აქაც როგორც სხვა პროდუქტების მიღების დროს დოზირებას აქვს გადამწყვეტი მნიშვნელობა. ანუ დღის განმავლობაში შეგვიძლია მივიღოტთ 1 ცალი ბანანი, რადგან მასში შემავლი კალიუმი და მაგნიუმი ხელს უწყობს გულის კუნთის აქტიურ მუშაობას.

„რაც შეეხება ნიორს, მასში შემავალი ნივთიერებები-ანტიოქსიდანტები, რომელიც იცავს ჯანმრთელ უჯრედებს მავნე ზემოქმედებისგან და ასევე აძლიერებს იმუნური სისტემის მუშაობას, მნიშვნელოვანია ზამთრის სეზონზე და განსაკუთრებით პანდემიის პირობებში. თუმცა მისი დღიური რეკომენდირებული დოზა გახლავთ 2-3 კბილი, რადგან არ მოხდეს ნაღვლის ბუშტის გაღიზიანება, რომელიც სხვადასხვა სიმპტომატიკით შეიძლება განვითარდეს“, - თქვა ლაშა უჩავამ.

ენდოკრინოლოგი ასევე გვირჩევს წყლის სწორად მიღებას - წონის მიხედვით დღიური ნორმის განსაზღვრას (ჩვენი წონა უნდა გავამრავლოთ 0,033-ზე. მიღებული ციფრი გახლავთ წყლის რაოდენობის დღიური ნორმა); დღეში 4-5 ჯერ დაბალანსებულ კვებას, რომლის შემადგენლობაში უნდა იყოს სასარგებლო პროდუქტები: ხორცი, თევზი, ბოსტნეული, ხილი და რძის პროდუქტები. უნდა შევზღუდოთ ტკბილი და მარილიანი საკვების მიღება.