ყოფილი კულტურის სახლი, სადაც დროებით ზუგდიდის თეატრია განთავსებული და სადაც საშაურმე „არტ შაურმა“ გაიხსნა, მუნიციპალიტეტის ბალანსზეა. მერიამ ის ერთი წლით იჯარით გასცა კერძო პირზე.

სწრაფი კვების ობიექტი, რომლის სახელწოდებაც სოციალურ ქსელში ხუმრობის საგანი გახდა, 3 დღის წინ გახსნა თეატრის მსახიობმა მალხაზ მესხიამ. სწორედ ის გახდა მერიის მიერ გამოცხადებულ აუქციონში გამარჯვებული და ყოფილ კულტურის სახლში 8,27 კვადრატული მეტრის ფართი 1 წლის ვადით, იჯარით აიღო.

ის „ლაივპრესთან“ საუბრში აცხადებს, რომ ობიექტი კანონის სრული დაცვით გახსნა და სახელწოდება „არტ შაურმა“, „როგორც კულტურასთან დაახლოებულმა“ პირმა და მსახიობმა თავად შეარჩია. მისთვის გაუგებარია რატომ გახდა სოციალური ქსელის მომხმარებლებისთვის ობიექტის სახელწოდება საქილიკო.

„მე როგორც თეატრში მომუშავე ადამინი, როგორც მსახიობი და კულტურასთან დაახლოებული ადამიანი, აქედან გამომდინარე დავარქვი მას (საშაურმეს) „არტ შაურმა“. ეს ერთი, მეორე - როგორც ძველი კულტურის სახლი, რომელიც არის კულტურის, ანუ არტი, კულტურა ეს სახელები ერთმანეთთან კავშირში რომ არის, აქედან გამომდინარეც არტ დავარქვი და არ დამირქმევია მაგალითად, ვიღაც მალხაზის სახელი „მალხაზის შაურმა“ და რაღაც“, - ამბობს მსახიობი.

მისივე თქმით, სადაც ამდენი კრიტიკაა, იქ კარგი საქმეც უნდა აღინიშნოს. მაგალითად ის, რომ კვების ობიექტის მოწყობის პარალელურად მოაწესრიგა მიმდებარე ტერიტორია. მანვე აღნიშნა, რომ დასაქმებული ჰყავს 4 ადამიანი და არის კეთლსინდისიერი გადამხდელი.

„მე სასიკეთო რაღაცას ვაკეთებ სხვისთვის, ჩემთვისაც და თუნდაც სახელმწიფოსთვის. ის რომ ახლა დავსხდეთ, ტელეფონები დავიჭიროთ, დამცინავი სმაილები ვწეროთ და ვითომ დამცინავი, ცუდი კომენტარები დავწეროთ, ცოტა არ იყოს გულდასაწყვეტია“, - განმარტავს მალხაზ მესხია.

რაც შეეხება ნიღბის ნახატს რაც დატანილია ობიექტის ფასადზე სახელწოდების პარალელურად, მალხაზ მესხია ამბობს, რომ ეს არ არის თეატრალური ნიღაბი.

ზუგდიდის მერიის პრესსამსახურში „ლაივპრესს“ განუმარტეს, რომ შენობა, რომელიც არის მუნიციპალიტეტის ბალანსზე, უკვე აღარ არის კულტურის სახლი და თეატრი აქ მხოლოდ დროებით არის განთავსებული, რომელიც მალე ახალ შენობაში გადავა.

„მოიჯარეს უფლება აქვს ნებისმიერი საქმიანობა განახორციელოს, რაც კანონით არის დაშვებული“, - განმარტეს მერიაში.

ზუგდიდის შალვა დადიანის სახელობის დრამატული თეატრი გამოეხმურა, შენობაში სადაც ის დრეოებით ფუნქციონირებს საშაურმე „არტ შაურმის“ გახსნის ფაქტს. განცხადებაში, რომელიც თეატრის ოფიციალურ ფეისბუკ გვერდზე გამოქვეყნდა, ნათქვამია რომ სწრაფი კვების ობიექტთან თეატრს კავშირი არ აქვს:

„თეატრი სრულიად ემიჯნება არსებულ „ობიექტს“ და მასთან არავითარი მორალური, იურიდიული თუ ფინანსური კავშირი არ გააჩნია! მეტიც, თეატრის დანიშნულების სპეციფიკიდან გამომდინარე, სიტყვიერი მოლაპარაკების მიუხედავად, „ობიექტმა“ ფუნქციონირება მაინც დაიწყო".

ცნობისთვის, ზუგდიდის შალვა დადიანის სახელობის სახელმწიფო დრამატული თეატრის დასი სამუშაოდ ყოფილ კულტურის სახლში 2017 წელს გადავიდა. თეატრის შენობა, რომელიც ავარიულ მდგომარეობაში იყო, 2018 წელს დაანგრიეს და მის ნაცვლად ახალი შენდება.