ზუგდიდის მერიამ რუხის კლინიკაში მომუშავე ექიმების სასტუმროს და კვების მომსახურებაზე დეკემბერში 3 ტენდერი გამოაცხადა, რაზეც ჯამში 40 ათას 526 ლარი გამოყო სარეზერვო ფონდიდან.

15 დეკემბერს გამოცხადდა 15 ათასი ლარის ღირებულების ტენდერი სასტუმროს მომსახურებაზე. მანამდე, კვებაზე 520 ლარი, 2 დეკემბერს კი, ასევე სასტუმროს მომსახურებაზე 25 ათასი ლარი.

მერიას გამარტივებული შესყიდვით ტენდერის გამოცხადებაზე სახელმწიფო რწმუნებულის მოვალეობის შემსრულებელმა მალხაზ თორიამ მიმართა.

"საქართველოს ადმინისტრაციულ-ტერიტორიულ ერთეულებში - აბაშის, ზუგდიდის, მარტვილის, მესტიის, სენაკის, ჩხოროწყუს, წალენჯიხის, ხობის მუნიციპალიტეტებსა და ქალაქ ფოთის მუნიციპალიტეტში სახელმწიფო რწმუნებულის მოვალეობის შემსრულებლის - სამეგრელო-ზემო სვანეთის ადგილობრივი ოპერაციული შტაბის ხელმძღვანელის ბატონ მალხაზ თორიას 2020 წლის 11 ნოემბრის წერილით ზუგდიდის მუნიციპალიტეტს, კორონავირუსის (ჩOVID-19) ფართო გავრცელებასთან დაკავშირებით, შპს "აკადემიკოს ნიკოლოზ ყიფშიძის სახელობის ცენტრალური საუნივერსიტეტო კლინიკის რუხის ფილიალში" სამედიცინო პერსონალის გაზრდილი რაოდენობის საჭიროების გათვალისწინებით, ეთხოვა მობილიზებული სამედიცინო პერსონალის საცხოვრებელი პირობებით უზრუნველყოფის მიზნით სასტუმროში დაბინავებისა და კვებითი მომსახურების განხორციელება", - ნათქვამია სატენდერო დოკუმენტაციაში, თუმცა რამდენი ექიმისთვისაა სასტუმროს და კვების ხარჯები ამაზე ინფორმაცია მოცემული არ არის.

მოგვიანებით, სახელმწიფო რწმუნებულის პრესსამსახურში "ლაივპრესს" უთხრეს, რომ საუბარია მედპერსონალის 22 წარმომადგენელზე, ვის მომსახურებაზეც ტენდერი გამოცხადდა.

დოკუმენტაციის მიხედვით, ისინი მოიწვიეს თბილისის სხვადასხვა სამედიცინო დაწესებულებიდან. მათი საცხოვრებელი პირობებით უზრუნველყოფის მიზნით საჭირო გახდა დაბინავების ორგანიზება და კვებით უზრუნველყოფა.

ხელშეკრულებები დაიდო მიმწოდებლებთან შპს "გრანდი" და ინდივიდუალური მეწარმე "მაია მიქავა".