მესტიაში დიდი რაოდენობის ელექტროენერგიის დატაცების ფაქტი აღმოაჩინეს. ინფორმაციას "ენერგო-პრო ჯორჯია" ავრცელებს. მათი თქმით, ცენტრში არსებულ სასტუმრო "ბანგურიანის" დამხმარე ფართში, ადგილობრივმა პოლიციამ გამოავლინა კრიპტოვალუტების მწარმოებელი აპარატების დიდი რაოდენობა, რომლებიც უკანონოთ მოიხმარდნენ დიდი რაოდენობით ელექტროენერგიას.

კომპანიის ცნობით, მესტიაში, განსაკუთრებით ბოლო ერთ წელიწადში ძალიან გაზრდილია ელექტროენერგიის მოხმარება. ამის მიზეზია გახსნილი კრიპტოვალუტის მწარმოებელი პუნქტები, რომლებიც იტაცებენ დიდი რაოდენობით ელექტროენერგიას.

მათივე ინფორმაციით, მაგალითად, სასტუმრო ,,ბანგურიანში" აღმოჩენილი დატაცება უტოლდება 4-5 საშუალო სოფლის მოხმარებას.

"შეიძლება ითქვას, რომ მხოლოდ მესტიის რაიონი, ამ დროისთვის საშუალოდ მოიხმარს 12-14 სხვა რაიონის სამყოფ ელექტროენერგიას. ელექტროენერგიის გაზრდილ მოხმარებას ფიზიკურად ვერ უძლებს ადგილზე არსებული ელექტროქსელი. ხშირად ხდება ავარიების ფაქტები და კომპანიის თანამშრომლები ცდილობენ დროულად შეაკეთონ მწყობრიდან გამოსული ქსელი, თუმცა ელექტროენერგიის განსაკუთრებით მომატებულ მოხმარებას, კვლავ მწყობრიდან გამოყავს. ამასთან, ენერგო-პრო ჯორჯიას თანამშრომლებს არ აქვთ ადგილზე უსაფრთხოდ გადაადგილების და ელექტროენერგიის დატაცების ფაქტების აღმოჩენის საშუალება", - ნათქვამია განცხადებაში.