ზუგდიდის სტადიონის მშენებლობისას დაშვებულ შეცდომებში პრემიერობის კანდიდატი ადგილობრივ ხელისუფლებას ადანაშაულებს. ამის შესახებ გიორგი გახარიამ პარლამენტის სხდომაზე, დეპუტატ ლევან კობიაშვილის მიერ დასმული კითხვის პასუხად განაცხადა, სადაც მთავრობას ნდობა უნდა გამოუცხადონ.

გახარია ამბობს, რომ სერიოზული შეცდომები დაუშვა მუნიციპალიტეტის ხელმძღვანელობამ თავის დროზე, რომლის გამოსწორებაზეც ბევრი რესურსი, დრო და ადამიანური კაპიტალი დაიხარჯა. პრემიერობის კანიდატი ფიქრობს, რომ ეს საქმე გამოსაძიებელია.

"ზუგდიდის სტადიონი ჩვენ ძალიან გვტკივა. გულწრფელად გეუბნებით. რამდენი წელი, ცოტა პროგრესი. შემდეგ სერიოზული შეცდომები იყო ადგილობრივი ხელისუფლების თავის დროზე დაშვებული, რომლის გამოსწორებაც რესურსიც ბევრი დაჯდა, დროც და ადამიანური კაპიტალიც. საერთოდ გამოსაძიებელია ეგ საქმე, მე თუ მკითხავთ. რატომ მოხდა ის, რაც მოხდა, აი პირველ ეტაპზე ამხელა რესურსი რომ იყო დახარჯული. ახლაც გარკვეული პროცესები მიმდინარეობს. ისე არ მიმდინარეობს, როგორც ზუგდიდელებს დააკმაყოფილებს, მაგრამ გარწმუნებთ, რომ სტადიონის მშენებლობა მაქსიმალურად შესაძლებელ მოკლე ვადებში დასრულდება", - განაცხადა გიორგი გახარიამ.

მისივე თქმით, ეცდებიან, რომ მსგავსი რამ არ განმეორდეს და ყველას შესაბამისი პასუხი მოსთხოვონ.

რა ეტაპზეა დღეს უეფას მესამე კატეგორიის სტადიონის მშენებლობა, რას ფიქრობენ პრემიერობის კანდიდატის ბრალდებაზე, პასუხს "ლაივპრესი" ზუგდიდის მერიისგან ელოდება.

მუნიციპალური განვითარების ფონდმა ზუგდიდის საფეხბურთო სტადიონის დასასრულებლად და სათადარიგო სტადიონის ასაშენებლად გამარჯვებული კომპანია ჯერ კიდევ შარშან, ოქტომბერში გამოავლინა. ამ სამუშაოებისთვის 10 მილიონი ლარი გამოიყო.

მშენებლობა თავდაპირველი გეგმის მიხედვით, გასული წლისთვის უნდა დასრულებულიყო, თუმცა გადავადდა პროექტში შესული კორექტირების გამო. სულ ამისთვის 20 მილიონი ლარი უნდა დახარჯულიყო.

ძირითადი სტადიონის შენობაში ხარვეზები ფრაქცია ენმ-მ მონიტორინგის დროს, 2019 წლის იანვარში აღმოაჩინა და ფოტოები სოციალურ ქსელში განათავსა. ჟურნალისტებს სტადიონის ადმინისტრაციული შენობის პირველ სართულზე ჭერი ჩამოშლილი დაგვხვდა. კერძოდ, სადაც საპირფარეშოებია მოწყობილი, ჭერი თითქმის სრულად იყო ჩამოშლილი, მეორეგან, სადაც საშხაპეებია, სანახევროდ. ოთახებსა და დერეფანში ნესტის სუნი იდგა.

მაშინ მერიაში გვითხრეს, რომ სტადიონის პირველი ეტაპის სამუშაოები როცა სამშენებლო კომპანია "დაგისგან" ჩაიბარეს, მსგავსი პრობლემები არ ყოფილა და ეს ვითარება, რაც იქ ვნახეთ, მხოლოდ რამდენიმე დღის წინ გამოვლინდა. მერის მოვალეობის შემსრულებელმა მაიზერ ნანავამ განმარტა, რომ თუ გამოიკვეთებოდა უხარისხო მშენებლობის საკითხი, შემსრულებელი აუცილებლად დაისჯებოდა.

პირველი ეტაპის სამუშაოები "დაგმა" შეასრულა.

მოგვიანებით კი ადგილობრივმა ხელისუფლებამ განაცხადა, რომ ეს ხარვეზები აღმოიფხვრა.

ამას გარდა, მოსარღვევი იყო ბეტონის კედელი, რომელიც ხელს უშლიდა მაყურებელს, კონკრეტული ადგილიდან სტადიონის ერთი კუთხე სრულად დაენახა.

ზუგდიდის სტადიონის მშენებლობა 2015 წელს დაიწყო.