ჟურნალისტი ეკა ხოფერია აფხაზეთის ავტონომიური რესპუბლიკის განათლების და კულტურის მინისტრად დაინიშნა. ეს ინფორმაცია რადიო თავისუფლებას თავად ეკა ხოფერიამ დაუდასტურა და განაცხადა, რომ შემოთავაზება აფხაზეთის ავტონომიური რესპუბლიკის მთავრობის თავმჯდომარე - რუსლან აბაშიძისგან, მიიღო, რამდენიმედღიანი ფიქრის შემდეგ კი დათანხმდა ახალი ვალდებულებების აღებას.

„ვფიქრობ შემოთავაზების წინაპირობა იყო ის პროექტი, რომელიც ჩვენმა ჟურნალმა აფხაზეთის ავტონომიური რესპუბლიკის მთავრობასთან ერთად დავიწყეთ - "მე აფხაზეთისთვის". მისი მიზანი იყო ახალი სახეების აღმოჩენა, მათზე დაწერა. მას შემდეგ რამდენიმე ხანში შემომთავაზა რუსლან აბაშიძემ ეს თანამდებობა. დავთანხმდი, რადგან რთული დროის და დიდი გამოწვევის მიუხედავად მინდა გუნდთან ერთად ბევრი კარგი გავაკეთო. ჩემთვის აფხაზეთის თემა უცხო არ არის, რადგან ჩემი მშობლები არიან იქიდან და დღესაც მყავს აფხაზეთში ნათესავები. ცოტ-ცოტაც ჩემი ჟურნალისტური გამოცდილებიდან გამომდინარე ყველა თემასთან დაკავშირებით მქონდა შეხება და მონდომებული ვარ რომ უფრო მეტი გავაკეთოთ.“

საკადრო ცვლილებებზე და ახალი გუნდის წევრების დამატებაზე ეკა ხოფერია ამჟამად არ საუბრობს, რადგან მისი თქმით, საჭიროა ადგილზე მისვლა და სიტუაციის გაცნობა.

ჟურნალ „სითის“, რომელსაც ეკა ხოფერია 11 წელი უძღვებოდა, მისი და თეა ხოფერია უხელმძღვანელებს. ეკა ხოფერიას განცხადებით სულ მალე მოხდება მისი სამინისტროში მისვლა და თანამდებობაზე ოფიციალური წარდგენა.