ამ წუთებში ზუგდიდის სასამართლოში ფოთში მომხდარ მკვლელობაში ბრალდებულის სასამართლო პროცესი მიმდინარეობს. მოსამართლე ბრალდებულისთვის აღკვეთის ღონისძიების შეფარდებაზე მსჯელობს. დაკავებულის ადვოკატის, ნუგზარ ტყებუჩავას განცხადებით, მისი დაცვის ქვეშ მყოფი დანაშაულს არ აღიარებს და ამბობს, რომ ამ საქმესთან მას არავითარი კავშირი არ აქვს.

დაცვის მხარე სასამართლოს შესთავაზებს გათავისუფლების სანაცვლოდ 30 ათასი ლარის ოდენობის გირაოს.

"მოლოდინი გვაქვს ერთადერთი, სასამართლო იქნება თუ არა მოწოდების დონეზე, გათავისუფლებულია თუ არა ის ძველი მენტალიტეტისგან. იქნება თუ არა ის დამოუკიდებელი. ამაზეა დამოკიდებული მისი გადაწყვეტილება", - განმარტა უფლებადამცველმა.

4 თებერვალს ფოთში, საპატრულო პოლიცის შენობის მიმდებარედ, 45 წლამდე მამაკაცი, საკუთარ ავტომანქანაში ჩაცხრილეს.

განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს.

დანაშაული 7 დან 15 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ დაკავებულმა 2021 წლის 4 თებერვალს ფოთში, ჭავჭავაძის ქუჩაზე, წარსულში არსებული დაპირისპირების გამო, 1978 წელს დაბადებული გ.ა. ცეცხლსასროლი იარაღიდან გასროლით მოკლა და შემთხვევის ადგილიდან მიიმალა. პოლიციამ ცხელ კვალზე ჩატარებული ოპერატიული და საგამოძიებო ღონისძიებების შედეგად შ.პ. მომხდარიდან მალევე, ფოთში დააკავა.