პრემიერ-მინისტრობის კანდიდატ ირაკლი ღარიბაშვილის განცხადებით, სადაც არ უნდა იმალებოდეს „ნაციონალური მოძრაობის“ თავმჯდომარე ნიკა მელია, ვერ დაემალება მართლმსაჯულებას და კანონი უნდა აღსრულდეს. მან ამის შესახებ პარლამენტში, ფრაქცია „ქართული ოცნების“ სხდომაზე სიტყვით გამოსვლისას განაცხადა.

ღარიბაშვილის სიტყვებითვე, ნიკა მელია კრიმინალია. პრემიერობის კანდიდატმა აღნიშნა ასევე რომ მზად არიან დიალოგისთვის ყველა იმ კონსტრუქციულად განწყობილ ოპოზიციასთან, ვისაც სურს, „მძევლობიდან და ძალადობიდან“, ასევე „დესტრუქციული პოლიტიკისგან“ გამოყოყოფა, რომელიც ყოფილი პრეზიდენტის მიხეილ სააკაშვილისა და მისი დანიშნული სხვადასხვა „კრიმინალებისგან“ მომდინარეობს.

„ამ შემთხვევაში ნიკა მელაის ვგულისხმობ, რომელიც რა თქმა უნდა, კრიმინალია, იმიტომ რომ ბანკი „ქართუს“ გაკოტრების საქმეზე სასამართლომ შერაცხა ის კრიმინალად. ეს ყველას ავიწყდება. ყველას შევახსენებ, რომ ამ ქვეყანაში ალიბი არ შეიძლება იყოს პოლიტიკური პარტიის ფორმალური თავმჯდომარეობა. ყველას შევახსენებ, ნიკა მელია „ნაცმოძრაობის“ როგორი თავმჯდომარეა. „ნაცმოძრაობის თავმჯდომარე არის სააკაშვილი, სხვა ლიდერი „ნაცმოძრაობაში“ არ არსებობს. მელია, ვაშაძე... არიან ყოველთვის დროებითი ფორმალური სახეები. ნახეთ, მელიასთან მიმართებით მათი გათვლით, როგორი „ჭკვიანური“ სვლა გააკეთეს. მელია არის გასამართლებული, მას მიესაჯა კონკრეტული სასჯელი ბანკი „ქართუს“ საქმეზე. ჩვენი ჰუმანური პოლიტიკა და ივანიშვილის საკითხებისადმი ჰუმანური დამოკიდებულება ამაშიც გამოჩნდა. მას პირობითი სასჯელი და ჯარიმა მიესაჯა. ის არის ჩვეულებრივი კრიმინალი. ეს კრიმინალი რამდენიმე თვის წინ პარტიის თავმჯდომარედ გამოაცხადეს. გვეუბნებიან, რომ იმ მძიმე დანაშაულს, რომელიც მან სავარაუდოდ ჩაიდინა, პარლამენტზე შტურმის ორგანიზებას და ხელისუფლების ძალადობრივი დამხობის მცდელობას ვგულისხმობ, თურმე არ უნდა შევეხოთ მელიას. მე ვეკითხები ყველას, რომელ ქვეყანაში გინახავთ, რომ მსგავსი ტიპის მძიმე დანაშაულებისთვის ადამიანებს რაღაც ინდულგენციებს აძლევდნენ? როდის ყოფილა პოლიტიკური პარტია ასეთი კრიმინალების თავშესაფარი გამხდარა,“ - განაცხადა ღარიბაშვილმა.

მისივე თქმით, არც პოლიტიკური პარტია, არც რაიმე თანამდებობა არ იქნება მათი დანაშაულებისა და კრიმინალის თავშესაფარი.

„თუ ისინი ღიად აცხადებენ, რომ ასეთი პარტია არის კრიმინალების თავშესაფარი და ტერორისტების თავშესაფარი, მაშინ ესეც ჩვენი პროკურატურისთვის მორიგი აღიარებაა. ასე რომ, ჩემი პასუხი მარტივია, კანონი უნდა აღსრულდეს, ჩვენს ქვეყანაში უნდა იყოს წესრიგი და ყველა ეს ადამიანი თუ ორგანიზაცია, რომელიც გასულია კონსტიტუციური წესრიგიდან და ჩარჩოებიდან, მათ მოუწევთ ამ ჩარჩოებში დაბრუნება. ამის გარანტიას ვიძლევი! ოპოზიციასთან მოლაპარაკება და დიალოგი აუცილებელია, მაგრამ არა ამ კრიმინალებთან, დესტრუქციულ ცხელ თავებთან, რომელთაც ჩვენი ქვეყნის დანგრევა სურთ. კიდევ ვიმეორებ, რომ ბატონი მელია, ნებისმიერი, ამ შემთხვევაში გვარს არ აქვს მნიშვნელობა, სადაც არ უნდა იმალებოდეს, ვერ დაემალება მართლმსაჯულებას, კანონი უნდა აღსრულდეს! კანონი აღსრულდება როგორც წესია და კიდევ ერთხელ მოვუწოდებ ამ ადამიანებს, რომ დაბრუნდნენ კანონისა და კონსტიტუციის ჩარჩოებში. მათ ამის გაკეთება მოუწევთ ძალიან მალე!“ - განაცხადა ღარიბაშვილმა.

ენმ-ის თავმჯდომარე ნიკა მელიას აღკვეთის ღონისძიების სახედ სასამართლომ პატიმრობა 17 თებერვალს შეუფარდა. 18 თებერვალს დილით კი, "ერთიანი ნაციონალური მოძრაობის" ცენტრალურ ოფისში არ შეუშვეს პოლიცია ადგილზე მობილიზებულმა აქტივისტებმა. მხარდამჭერები აცხადებდნენ, რომ არ დაუშვებენ "უსამართლოდ გასამართლებული" ნიკა მელიას დაკავებას. ამის შემდეგაც პრემიერ-მინისტრი გიორგი გახარია გადადგა, მან თქვა, რომ გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე.

გახარიას გადადგომის შემდეგ ნიკა მელიას მიმართ დაგეგმილი ღონისძიება შსს-მ დროებით გადადო.