სახალხო დამცველმა ნინო ლომჯარიამ "ერთიანი ნაციონალური მოძრაობის" ლიდერი ნიკა მელია სასჯელაღსრულების დაწესებულებაში მოინახულა.

ომბუდსმენის თქმით, როგორც მელიამ განუმარტა, მის მიმართ ძალის გამოყენებას ან ფიზიკურ შეურაცხყოფას ადგილი არ ჰქონია და ფიქრობს რომ ციხეში არსებული პირობები დამაკმაყოფილებელია. ნინოლომჯარიას განმარტებით, ერთადერთი მოთხოვნა არის ის, რომ საკანში ჰქონდეს ტელევიზორი.

"თავს გრძნობს მხნედ და ჰქონდა სურვილი, რომ საჯაროდ მეთქვა, საკმაოდ ოპტიმისტურ განწყობაზეა. ერთადერთი მოთხოვნა არის ის, რომ საკანში არ აქვს ტელევიზორი, ჩვენ ვესაუბრეთ ციხის ხელმძღვანელობას და იმედი მაქვს, რომ ეს ლოჯისტიკური საკითხი დროულად მოგვარდება და მიეცემა საშუალება, რომ გაეცნოს მიმდინარე მოვლენებს",- განაცხადა ნინო ლომჯარიამ.

თავის მხრივ ნიკა მელიას მოთხოვნაზე განცხადებას ავრცელებს სპეციალური პენიტენციური სამსახური. როგორც განცხადებაში ვკითხულობთ, მას ექნება ტელევიზორით სარგებლობის უფლება იმ შემთხვევაში, თუ შეიძენს ტელევიზორს პენიტენციური დაწესებულების მაღაზიაში.

"ნებისმიერ პატიმარს, მათ შორის ნიკანორ მელიას, პენიტენციურ სისტემაში მოხვედრის შემდეგ უნდა დაუმზადდეს საბანკო ბარათი, რომლითაც ის შეძლებს პენიტენციური დაწესებულების მაღაზიაში ანგარიშსწორებას. ამისთვის პენიტენციური დაწესებულების ადმინისტრაცია პატიმრის მონაცემებს დადგენილი წესით აწვდის ბანკს, რაც დღეს უკვე გაკეთდა და რამდენიმე დღეში დამზადდება საბანკო ბარათი, ისევე როგორც ციხის გარეთ მყოფი სამოქალაქო პირის შემთხვევაში ხდება. სწორედ ამ პროცედურის გავლა არის საჭირო იმისთვის, რომ ბრალდებულმა შეძლოს ტელევიზორის შეძენა", - ნათქვამია განცხადებაში.

"ერთიანი ნაციონალური მოძრაობის" თავმჯდომარე ნიკა მელია პარტიის ოფისში 23 თებერვალს სპეციალური დანიშნულების რაზმმა დააკავა.

ფაქტს საერთაშორისო საზოგადოების მწვავე შეფასება მოჰყვა. გაერთიანებული ოპოზიცია მხარდამჭერებთან ერთად აპროტესტებს მელიას დაკავებას. ისინი მელიას გათავისუფლების მოთხოვნით საპროტესტო გამოსვლების გაგრძელებას გეგმავენ.

ენმ-ის თავმჯდომარეს აღკვეთის ღონისძიების სახედ სასამართლომ პატიმრობა 17 თებერვალს შეუფარდა. 18 თებერვალს დილით კი, "ერთიანი ნაციონალური მოძრაობის" ცენტრალურ ოფისში არ შეუშვეს პოლიცია ადგილზე მობილიზებულმა აქტივისტებმა. მხარდამჭერები აცხადებდნენ, რომ არ დაუშვებენ "უსამართლოდ გასამართლებული" ნიკა მელიას დაკავებას. ამის შემდეგაც პრემიერ-მინისტრი გიორგი გახარია გადადგა, მან თქვა, რომ გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე.

გახარიას გადადგომის შემდეგ ნიკა მელიას მიმართ დაგეგმილი ღონისძიება შსს-მ დროებით გადადო. 23 თებერვალს, პრემიერ-მინისტრად ირაკლი ღარიბაშვილის დამტკიცებიდან რამდენიმე საათში, სამართალდამცველები ოფისში ისევ მივიდნენ. მანამდე საპარლამენტო მოსმენაზე სიტყვით გამოსვლისას ღარიბაშვილმა ნიკა მელიაზე საუბრისას აღნიშნა, რომ "კანონი უნდა აღსრულდეს".