"ერთიანი ნაციონალური მოძრაობის" თავმჯდომარე ნიკა მელია დღეს ზუგდიდში თანაპარტიელებს შეხვდა.

"მინდა ყველა საქართველოს მოქალაქეს გაუღვივდეს რწმენა, რომ ამ სახელმწიფოს, ამ ქვეყანას აქვს რესურსი და პოტენციალი, იყოს ერთ-ერთი მდიდარი სახელმწიფო, სადაც ბედნიერი მოქალაქეები ცხოვრობენ და ერთ-ერთი განვითარებული სახელმწიფო ევროპის კონტინენტზე, ეს შესაძლებელელია და ამას სჭირდება ინტელექტურალური რესურსი, რომელიც არსებობს. სჭირდება რწმენა, რომელიც უკეთესის იმედს ტოვებს, მაგრამ საზოგადოების აქტიური ნაწილის ძალისხმევაა მნიშვნელოვანი, რომ სხვებსაც რწმენა გადავდოთ.

დარწმუნებული ვარ, არცთუ ისე შორეულ პერსპეტქივაში ეს ქვეყანა გახდება ისეთი დამოუკიდებელი სახელმწიფო, რომელზეც დღევანდელი დღის იუბილარი მერაბ კოსტავა, ყველაზე გაუტეხელი ქართველი ეროვნული საზოგადო მოღვაწე ოცნებობდა", - განაცხადა ნიკა მელიამ შეხვედრის დასრულების შემდეგ.

მისივე თქმით, დღეს გამართულ შეხვედრაზე ბევრ მნიშვნელოვან საკითხზე ისაუბრეს, მათ შორის პარლამენტში შესვლაზე.

"ბევრი სხვადასხვა მნიშვნელოვანი საკითხებია, რაზეც ვისაუბრეთ და რაზეც შევთანმხდით. ის რომ პარტიაში იყო, ან არის და იქნება განსხვავებული მოსაზრებები, მიხარია. ასეთი პარტია მინდა ავაშენო, სადაც პარტია 1, 2 და 3 ადამიანის გარშემო არ იქნება გაერთიანებული, ეს არის მარცხი. იქნება გაერთიანებული რეალურად იდეების, ღირებულებების და ფასეულობების გარშემო და არ იქნება ვერტიკალური მართვა. თუმცა რა თქმა უნდა. ლიდერს აქვს თავისი წონა გადაწყვეტილების მიღების პროცესში. ხშირად ის უკეთ ხედავს, ვიდრე მისი თანაგუნდელები, რომლებიც შესაძლებელია იყვნენ მოწყვეტილნი მოლაპარაკების მაგიდას. ამისთვის უნდა ჩამოვიდე, შევხვდე ჩემს მეგობრებს, გავცვალოთ არგუმენტები და ამის შემდეგ მივიღოთ გადაწყვეტილება. ეს გავაკეთე ჩემს უსაყვარლეს ზუგდიდში, სამეგრელოში, სადაც გული მწყდება, რომ სამეგრელო არ უნდა იყოს ასეთ აუტანელ მძიმე სოციალურ მდგომარეობაში. სადმე თუ შეიძლება ნაკლებად უჭირდეს დღეს მოქალაქეებს ბევრი მიზეზის გამო, ეს არის სამეგრელო, მაგრამ პირიქით ხდება. რატომ? იმიტომ, რომ ამ ქალაქს, ამ რეგიონს, ამ ქვეყანას ხელისუფლება არ ჰყავს. ამიტომ მიხარია, რომ ყველა მნიშვნელოვან საკითხზე ჩვენ შევთანხმდით და ადგილობრივ დონეზე მნიშვნელოვანი გადაწყვეტილებები მივიღეთ", - განაცხადა პარტიის თავმჯდომარემ.

ნიკა მელიას არ დაუკონკრეტებია, რა შეთანხმებას მიაღწიეს პარლამენტში შესვლის საკითხზე, მისი განცხადებით, ის ზუგდიდის შემდეგ მიემგზავრება აჭარაში, რის შემდეგაც უახლოეს მომავალში რამდენიმე საკითხზე მიიღებს მნიშვნელოვან გადაწყვეტილებას.