პარტია "საქართველოსთვის" ხელმძღვანელად, "ექსპოზიციაში" მიმდინარე პარტიის პრეზენტაციაზე გიორგი გახარია აირჩიეს. გახარიამ შეკრებილებს მიმართა და უთხრა, რომ ისინი ერთიანდებიან საქართველოსთვის, მაგრამ არავის წინააღმდეგ. მანვე აღნიშნა, რომ გუნდთან ერთად იწყებს პოლიტიკურ პროცესებში აქტიურად ჩართვას ქვეყნისთვის.

"ჩვენ საზოგადოებასთან ერთად თვალყურს ვადევნებთ, რა ხდება ქვეყანაში. ჩემთვის და დარწმუნებული ვარ, საქართველოს ბევრი მოქალაქისთვის აბსოლუტურად ნათელია, რომ დღეს საქართველოს სჭირდება ის გუნდი, რომელსაც შეუძლია სიმართლეს გაუსწოროს თვალი. ჭირდება ისეთი გუნდი, რომელსაც შეუძლია სიმართლე უთხრას საქართველოს მოქალაქეს. უთხრას სიმართლე იმ გამოწვევებზე, რომლის წინაშეც დგას ქვეყანა და რაც მთავარია, მოქალაქეებთან ერთად, მათი ჩართულობით ქვეყანას შესთავაზოს სამართლიანი წესრიგი", - განაცხადა გიორგი გახარიამ.

მისივე თქმით, სამართლიანი წესრიგია ის სივრცე, რომელშიც ყველას ერთად შეეძლება მათივე შესაძლებლობების შესაბამისად, ემსახუროს საქართველოს და სახელმწიფოს. მანვე აღნიშნა, რომ სიმართლის ძალა შემდეგია - არ უნდა იცხოვრონ ილუზიაში. გახარიას სიტყვებით, ხანახან პოლიტიკური ველი, პოლიტიკური კულტურა აცხოვრებთ ილუზიაში, როცა პარტიებს შორის კინკლაობა და ჩხუბი შესაძლოა ვინმეს ეგონოს, რომ რაიმე სარგებლის მომტანია ქვეყნისთვის. ყოფილი პრემიერი არ იზიარებს ამ მოსაზრებას და ამბობს, რომ კარგ შემთხვევაში ეს ერთი და იმავე ადგილის ტკეპნაა, ცუდ შემთხვევაში კი ქვეყანა უკან იხევს.

გახარიას პარტიის პრეზენტაცია საპროტესტო აქციის ფონზე მიმდინარეობს. ყოფილ პრემიერს მოძრაობა "შეცვალეს" წევრები ახსენებენ იმ გახმაურებულ საქმეებს, რაც მთავრობის ექსმეთაურის ხელისუფლების ლებს უკავშირდება.

გიორგი გახარიამ პრემიერ-მინისტრის თანამდებობა 18 თებერვალს დატოვა. საგანგებოდ გამართულ ბრიფინგზე მან განაცხადა, რომ მიზეზი ენმ-ის თავმჯდომა ნიკა მელიას დაკავების საკითხზე თანაგუნდელებთან აზრთა სხვადასხვაობა იყო.