ბოდბელ ეპისკოპოსს, იაკობ იაკობაშვილს ქადაგება შეაწყვეტინა, ტაძარში მყოფმა ერთ-ერთმა ქალმა, რომელმაც 5 ივლისის ძალადობაში ეკლესიაც დაადანაშაულა. ვიდეო თავად ეპისკოპოსს აქვს გამოქვეყნებული სოციალურ ქსელში.

სასულიერო პირი ქადაგებისას 5 ივლისის ძალადობის ფაქტებზე და მას შემდეგ განვითარებულ მოვლენებზე საუბრობდა - მედიას, ლგბტქ თემის წარმომადგენლებს და ოპოზიციას აკრიტიკებდა, რა დროსაც მას სიტყვა შეაწყვეტინა მოქალაქემ.

"ასეთი ქადაგებით შეიძლება რამეს მივაღწიოთ? ასეთი ქადაგებით შეიძლება თავისუფლება მოვიპოვოთ? დემოკრატია მოვიპოვოთ?,თქვენ სად იყავით?, კარგად მოიქცნენ საპატრიარქოს წევრები?, - მიმართა ეპისკოპოსს ქალმა, რომელსაც სასულიერო პირმა უპასუხა, რომ იქ იდგა სადაც უნდა მდგარიყო და "საპატრიარქო ძალიან კარგად მოიქცა".

"ეს ქადაგება არ არის, ეს არის ერის უკან სვლა, მეტი არაფერი. მოდით ახლა და ჩამქოლეთ, მომისიეთ ეს ხალხი, ჩამქოლეთ. სად იყო საპატრიარქო?!, თქვენ თვითონ სად იყავით?! რა გინდათ ჟურნალისტებისგან, რა გინდათ ამ ადამიანებისგან?!. ეს არ არის ქადაგება, ეს არ არის სიყვარულისკენ სწრაფვა, ეს არ არის ნამდვილი მართლმადიდებლობა... ეს არის ყველაფრის მიწასთან გასწორება, მეტი არაფერი. ეს არის ბიზნესი, ეს არის ადამიანების სულის ჩახშობა. მე აქ ვერაფერს ვერ ვხედავ...ჩემი გულისწყრომა გამოიწვია ყველაფერმა რაც აქ ხდება, რაც საქართველოში ხდება, ამ ადამიანის სიკვდილმა, ჟურნალისტებზე ასე საუბარმა, პოლიტიკოსებზე ასე საუბარმა. როგორ შეიძლება...საპატრიარქო სად იყო, რატომ მოუწოდებდნენ ეს მღვდლები, თქვენ ხედავთ იმ კადრებში რაც ხდება. მოდით და ჩამქოლეთ ახლა. მე თვითონ ჟურნალისტი ვარ "ბოდბის სამრეკლოს" რედაქტორი. გაუსაძლისი გახდა ამ სოფელში ჩემი ცხოვრება, ჩემი ოჯახი მიწასთან გაასწორეს - რისთვის?! ხალხს წაართვეს ჰექტრობით მიწები... მე ვერ ვხედავ აქ ჭეშმარიტ სარწმუნოებას... დიახ მართლა ყარს საპატრიარქო და თქვენ არ გინდა გასუფთავდეს საპატრიარქო ამ სუნისგან?", - უთხრა ბოდბელ ეპისკოპოსს მოქალაქემ.

საპროტესტო გამოსვლები ქვეყნის მასშტაბით გრძელდება 5 ივლისს ჰომოფობიური ჯგუფების მიერ 50-ზე მეტი ჟურნალისტის მიმართ განხორციელებული ძალადობის შემდეგ. ვითარება გამწვავდა 11 ივლისს, როცა გარდაიცვალა ოპერატორი ლექსო ლაშქარავა, რომელსაც 5 ივლისს ჰომოფობიურმა ჯგუფებმა "სირცხვილიას" ოფისთან სცემეს.

ის 11 ივლისს, საკუთარ სახლში დედამ გარდაცვლილი იპოვა. ოჯახი აცხადებს, რომ ახალგაზრდა მამაკაცს მანამდე ჯანმრთელობის პრობლემები არ ჰქონია და მისი გარდაცვალება 5 ივლისს მიყენებულ მძიმე ტრავმებს უკავშირდება, რის გამოც მას სახეზე ოპერაციაც დასჭირდა. მომხდარზე შინაგან საქმეთა სამინისტრომ გამოძიება საქართველოს სისხლის სამართლის კოდექსის 115-ე, თვითმკვლელობამდე მიყვანის მუხლით დაიწყო.

11 ივლისს რუსთაველის გამზირზე შეიკრიბნენ მოქალაქეები, მათ შორის მედიის წარმომადგენლები და მოითხოვეს პრემიერ-მინისტრის ირაკლი ღარიბაშვილის, ასევე შინაგან საქმეთა მინისტრის გადადგომა, რადგან მათ ვერ შეძლეს მოქალაქეების უსაფრთხოების დაცვა და პირიქით, 5 ივლისს აქციამდე გააკეთეს "ძალადობის წამახალისებელი" განცხადებები.