მთავრობის ადმინისტრაციაში, საკოორდინაციო საბჭოს დასრულების შემდეგ, სანამ ტრადიციული ბრიფინგი დაიწყებოდა, ჟურნალისტებმა და ოპერატორებმა საპროტესტო აქცია გამართეს.

მათ "ტვ პირველის" გარდაცვლილი ოპერატორის ლექსო ლაშქარავას ხსოვნას პატივი მიაგეს, დაგმეს 5 ივლისის ძალადობის ფაქტები და გაახმოვანეს ორი მთავარი მოთხოვნა - გადაგეს პრემიერი-მინისტრი ირაკლი ღარიბაშვილი და დაისაჯოს 5 ივლისის ძალადობაში ჩართული ყველა პირი.

"თანამდებობა აუცილებლად უნდა დატოვოს პრემიერ-მინისტრმა ირაკლი ღარიბაშვილმა, რადგან ის არის ნომერ პირველი ჰომოფობი ჩვენს ქვეყანაში. ის არის მოძალადე პრემიერ-მინისტრი და დაუყოვნებლივ უნდა წავიდეს თანამდებობიდან. გარდა ამისა, დამნაშავეები, რასაკვირველია, უნდა დაისაჯონ,"- თქვა ჟურნალისტმა გიორგი კიკაბიძემ.

მისივე სიტყვებით, ლექსო ლაშქარავას დაკრძალვის დღეს, არავის აქვს მორალური უფლება ტრიბუნასთან დადგეს.

საპროტესტო გამოსვლები ქვეყნის მასშტაბით გრძელდება 5 ივლისს ჰომოფობიური ჯგუფების მიერ 50-ზე მეტი ჟურნალისტის მიმართ განხორციელებული ძალადობის შემდეგ. ვითარება გამწვავდა 11 ივლისს, როცა გარდაიცვალა ოპერატორი ლექსო ლაშქარავა, რომელსაც 5 ივლისს ჰომოფობიურმა ჯგუფებმა "სირცხვილიას" ოფისთან სცემეს.

ის 11 ივლისს, საკუთარ სახლში დედამ გარდაცვლილი იპოვა. ოჯახი აცხადებს, რომ ახალგაზრდა მამაკაცს მანამდე ჯანმრთელობის პრობლემები არ ჰქონია და მისი გარდაცვალება 5 ივლისს მიყენებულ მძიმე ტრავმებს უკავშირდება, რის გამოც მას სახეზე ოპერაციაც დასჭირდა. მომხდარზე შინაგან საქმეთა სამინისტრომ გამოძიება საქართველოს სისხლის სამართლის კოდექსის 115-ე, თვითმკვლელობამდე მიყვანის მუხლით დაიწყო. შსს-ში აცხადებენ, რომ შუალედური ქიმიური ექსპერტიზის მიხედვით, გარდაცვლილი ოპერატორის სისხლში აღმოჩნდა ნარკოტიკული ნივთიერება და შესაძლოა გარდაცვალების მიზეზი ზედოზირება იყოს.

აქციის მონაწილეებს შს სამინისტროს ამ ვერსიის არ სჯერათ, მიიჩნევენ რომ უწყება ცდილობს მოქალაქეების ყურადღება ძალადობის ფაქტებიდან სხვა თემაზე გადაიტანოს - ახალგაზრდა მამაკაცის სიკვდილის მიზეზად, არა მასზე განხორციელებული ძალადობა, არამედ ნარკოტიკული საშუალებების ზედოზირება დაასახელოს.

37 წლის ლექსო ლაშქარავას დღეს, 13 ივლისს დაკრძალავენ.