საქართველოს პრეზიდენტმა სალომე ზურაბიშვილმა ბათუმის სამიტის დეკლარაციის ხელმოწერის შემდეგ პეტრას ციხეზე, სადაც ხელმოწერის ცერემონია ჩატარდა, განაცხადა, რომ ის გახდა სამი ქვეყნის - საქართველოს, ბელორუსიის და უკრაინის საერთო მიზნების ნიშანი და ევროკავშირის შეხვედრის ადგილი.

პრეზიდენტის სიტყვებით, ამ სამ ქვეყანას ბევრი რამ აქვთ საერთო, მათ შორის ის, რომ არ სურთ უკან, წარსულში დაბრუნება:

"ძალიან ბევრი გვაქვს საერთო – წარსული, საერთო გამოწვევები, ჩვენი სუვერენიტეტისა და ტერიტორიული მთლიანობის კუთხით საერთო გამოწვევები, უსაფრთხოებისა და დესტაბილიზაციის მცდელობების კუთხით, რაც მომდინარეობს და შეიძლება იყოს გარე და შიდა წყაროებიდან. თუმცა, ჩვენ ასევე საერთო გვაქვს ის, რომ არ გვინდა, დავბრუნდეთ წარსულში. ჩვენ ვართ მზად და გამიზნული გვაქვს, რომ ვიბრძოლოთ ჩვენი ევროპული მომავლისთვის, ვებრძოლოთ პოლარიზაციის შემთხვევებს და პოლარიზაციის გამოწვევებს როგორც გარედან, ისე შიგნიდან. ჩვენი რეაგირება, ევროპული რეაგირებაა, არ მოხდება არც სტაგნაცია, არც შეყოვნება, მოხდება მხოლოდ წინსვლა მიზანმიმართულად, სწორი მიმართულებით და ეს არის გამძლეობის ნიშანი", – განაცხადა სალომე ზურაბიშვილმა.

როგორც საქართველოს პრეზიდენტმა აღნიშნა, ერთობლივი მემორანდუმი უნდა იყოს ახალი გზა, რომელსაც სამი ქვეყანა ერთად გაივლის. მისივე თქმით, ასოცირება არ უნდა იყოს მხოლოდ სიტყვა, მას ახალი მნიშვნელობა უნდა გააჩნდეს.

"უნდა გაითვალისწინოს ჩვენი, სამი ქვეყნის ლიდერთა საერთო განწყობისა და მიდგომის, დემოკრატიული მმართველობის, ძლიერი საზოგადოების მშენებლობის, საერთო მიდგომების ნიშანი, რათა განვითარდეს ჩვენი ქვეყნების ეკონომიკა, განხორციელდეს ერთობლივი პროექტები, არსებობდეს საერთო მიდგომები კონფლიქტების, ოკუპაციის, მე-20 საუკუნისა და დღევანდელი გამოწვევების დასაძლევად. ასოცირება ახალი მნიშვნელობის უნდა გახდეს იმდენად, რამდენადაც ჩვენ ვიკისრეთ ვალდებულება, რომ გავაგრძელოთ და გავაძლიეროთ რეფორმები, ადაპტაცია ევროკავშირის კანონმდებლობასთან ჩვენი ეროვნული კანონმდებლობის. გავაძლიეროთ ჩვენი სამართლის უზენაესობის პრინციპები და ასევე ვკისრულობთ ვალდებულებას, რომ ერთმანეთს დავუჭიროთ მხარი და გავაძლიეროთ.

"ასოცირებული ტრიოს" – საქართველოს, მოლდოვასა და უკრაინის სახელმწიფოს მეთაურებმა დღეს ხელი მოაწერეს დეკლარაციას, რომელშიც აღნიშნულია, რომ სამ ქვეყანას ევროკავშირში გაწევრიანების მიზანი აერთიანებს.

დეკლარაციას საქართველოს პრეზიდენტმა სალომე ზურაბიშვილმა, უკრაინის პრეზიდენტმა ვლადიმერ ზელენსკიმ და მოლდოვის პრეზიდენტმა მაია სანდუმ ხელი პეტრას ციხეში მოაწერეს.