"ერთიანი ნაციონალური მოძრაობის" თავმჯდომარე ნიკა მელიამ დღეს საზოგადოებას ოფიციალურად წარუდგინა საარჩევნო კანდიდატები. სამეგრელო-ზემო სვანეთის მასშტაბით დასახელდა მხოლოდ ზუგდიდის, ხობის და მარტვილის მერობის კანდიდატები.

ნიკა მელიას განცხადებით, მარტვილის მერობისთვის იბრძოლებს თემურ ჯანაშია - "პარლამენტის წევრი, გენერალი, მებრძოლი და თავდადებული ადამიანი, როგორც თემურს სჩვევია, ისე უშიშრად შედის ბრძოლაში საქართველოს უკეთესი მომავლისთვის... მე იშვიათად შემხვედრია ასეთი პატიოსანი და კეთილსინდისიერი ადამიანი, როგორიც თემურია", - ასე წარადგინა მან მარტვილის მერობის კანდიდატი.

ფოტოზე: მარტვილის მერობის კანდიდატი თემურ ჯანაშია

რაც შეეხება ხობის მუნიციპალიტეტს, აქ ოპოზიციურმა პარტიამ მერობის კანდიდატად ენმ-ის აფხაზეთის ორგანიზაციის თავმჯდომარე, ბესო შენგელია დაასახელა.

"ახალგაზრდა მებრძოლი, პრინციპული ადამიანი. ძალიან კარგად ვიცნობ მას. ბესოს მამამ თავი საქართველოს ერთიანობას შესწირა. ბესო საქართველოს დეოკუპაციისთვის და ჩვენი დევნილი მოქალაქეების საკუთარ სახლებში დასაბრუნებლად ჩვენთან ერთად აგრძელებს ბრძოლას და ვიბრძოლებთ მანამ, სანამ ჩვენი ეს სანუკვარი სურვილი და ოცნება არ ახდება", - განაცხადა ნიკა მელიამ ხობის მერობის კანდიდატის წარდგენისას.

ფოტოზე: ხობის მერობის კანდიდატი ბესო შენგელია

ენმ-ის თავმჯდომარემ ზუგდიდის მერობის კანდიდატად მამა, კარდიოლოგი ანზორ მელია დაასახელა. "ეს ადამიანი გახლავთ მთელი ჩემი ცხოვრების განმავლობაში მთავარი მოტივატორი. ადამიანი, რომლისგანაც ყველაფერი ვისწავლე - როგორ უნდა ვიყო პრინციპული, იქ სადაც უნდა ვიყო, სადაც საჭიროა და როგორ უნდა ვიყო მოტივირებული, თუნდაც მიწევდეს ყოფნა არამოტივირებულ გარემოში, როგორ უნდა გავარჩიო სიკეთე ბოროტებისგან და ნათელი ბნელისგან... დიდი მადლობა მას, რომ არ მიმატოვა ამ ბრძოლაში და ამ ბრძოლაში ჩვენ გვერდიგვერდ ვიქნებით ამ ქვეყნის გადასარჩენად და განსავითარებლად", - განაცხადა ნიკა მელიამ ზუგდიდის მერობის კანდიდატად მამის წარდგენისას.

ფოტოზე: ზუგდიდის მერობის კანდიდატი ანზორ მელია

პარტიის თავმჯდომარეს დღევანდელ ღონისძიებაზე არ დაუსახელებია ფოთის მერობის კანდიდატი. მანამდე ჟურნალისტებს განუცხადა ენმ-ის ფოთის ორგანიზაციის თავჯდომარე დარეჯან ცხვიტარიამ, რომ ფოთში მერობის კანდიდატი "ნაციონალური მოძრაობის" წევრი, პარლამენტარი თინა ბოკუჩავა იქნებოდა.

საქართველოში ადგილობრივი თვითმმართველობის არჩევნები 2021 წლის 2 ოქტომბერს გაიმართება.