ფოთში გაერთიანებული ოპოზიციის მერობის კანდიდატი გიგი უგულავა იქნება. ამის შესახებ "ლაივპრესთან" საუბარში "ერთიანი ნაციონალური მოძრაობის" ფოთის ორგანიზაციის თავმჯდომარე დარეჯან ცხვიტარიამ განაცხადა.

მისი სიტყვებით, გაერთიანებული ოპოზიცია რამდენიმე კანდიდატს განიხილავდა და საბოლოო ჯამში შეარჩია "გამოცდილი პოლიტიკოსი" გიგი უგულავა. მანვე დაადასტურა, რომ მსჯელობა მიმდინარეობდა "ერთიანი ნაციონალური მოძრაობის" ერთ-ერთი ლიდერის თინათინ ბოკუჩავას დასახელებაზეც.

"ის იქნება გაერთიანებული ოპოზიციის კანდიდატი 5 ნომრით... რამდენიმე კანდიდატზე იყო საუბარი და ეს იყო განხილვის თემა. ოპოზიციის გადაწყვეტილება იყო, რომ გიგი უგულავა გამოეშვათ ფოთში. ფოთი სტრატეგიული ქალაქია და გიგი უგულავა არის მძიმე წონის პოლიტიკოსი. აქვს უზარმაზარი გამოცდილება, არის თავისი საქმის პროფესიონალი", - განაცხადა დარეჯან ცხვიტარიამ.

მისივე სიტყვებით, ეს არ არის ადგილობრივი თვითმმართველობის, როგორც რიგითი არჩევნებისთვის მზადება, ეს არის ქვეყნისთვის გადამწყვეტი ეტაპი:

"ეს არის რეფერენდუმი, ყველაზე გადამწყვეტი ეტაპი საქართველოსთვის და ძალიან მობილიზებული უნდა ვიყოთ", - თქვა ენმ-ის ფოთის ორგანიზაციის თავმჯდომარემ.

"ევროპული საქართველოს" ერთ-ერთმა ლიდერმა გიგი უგულავამ, პარტია დავით ბაქრაძესთან ერთად 2021 წლის აპრილში დატოვა. გიგი უგულავას თქმით, 2020-ის არჩევნების "ტოტალური გაყალბების" მიუხედავად, პარტიისთვის ეს არჩევნები წარუმატებელი იყო. ასეთ დროს კი, სრულიად ლოგიკურია, რომ მმართველმა ლიდერებმა აღარ იყარონ კენჭი და მისცეს სხვებს შესაძლებლობა განავითაროს პარტია.

შეგახსენებთ, რომ გიგი უგულავა 2020 წლის პარლამენტის არჩევნებში ზუგდიდის მაჟორიტარი დეპუტატობის კანდიდატი იყო "ევროპული საქართველოდან". ცესკოს მონაცემებით, მან არჩევნებში ბრძოლა პირველივე ტურში დაასრულა, სადაც მას მხარი 3905-მა ამომრჩეველმა (7.22%) დაუჭირა.