დანიშნულების ადგილის მართვის ორგანიზაციის ხელმძღვანელ ლევან წულაიას განცხადებით, იმის გამო, რომ მისი ძმა ყოფილი პრემიერის, გიორგი გახარიას მხარდამჭერია, მასზე ზეწოლა ხორციელდება და ორგანიზაციის საქმიანობასაც ხელი ეშლება.

"ცენტრალური ხელისუფლების ერთ-ერთი მაღალი თანამდებობის პირისგან მივიღე შეტყობინება, რომ დამეტოვებინა თანამდებობა. იმის გამო, რომ ჩემი ძმა არის ოპოზიციის მხარდამჭერი. მე განვაცხადე. რომ არ დავტოვებ სამსახურს, მოიწვიეთ სამეთვალურეო საბჭო და გადაწყვიტეთ კანონიერად, რადგან მე პასუხისმგებლობა მქონდა აღებული საკუთარ თავთან, საერთაშორისო დონორ ორგანიზაციებთან. ამის შემდეგ დაიწყეს ორგანიზაციისთვის ხელის შეშლა, რაც გამოიხატა იმაში, რომ ამჟამინდელმა გუბერნატორმა გიორგი გუგუჩიამ გააფრთხილა მუნიციპალიტეტების მერები, რომ უარი ეთქვათ იმ თანხის გამოყოფაზე, რომელიც ჩვენი დაფინანსებისთვის იყო გათვალისწინებული", - განაცხადა ლევან წულაიამ ჟურნალისტებთან ბრიფინგზე.

ის საქმიანობისთვის ხელშეშლაში ადანაშაულებს ასევე ზუგდიდის მერის მოვალეობის შემსრულებელ კონსტანტინე კაკავასაც.

"ზუგდიდის მერი, რომელიც არის ჩვენი ორგანიზაციის სამეთვალყურეო საბჭოს თავმჯდომარე, მას აქვს ვალდებულება, რომ მიიღოს ისეთი გადაწყვეტილებები, რომელიც ხელს შეუწყობს ჩვენი ორგანიზაციის საქმიანობას, მერის მოვალეობის შემსრულებელმა კი გადაწყვიტა, რომ არ აინტერესებს ჩვენი ორგანიზაციის საქმიანობა. დაახლოებით 4 თვეა არ დაინტერესებულა რა ხდებოდა ორგანიზაციაში, რა მოვალეობები აკისრია, როცა ჩვენ ვთხოვდით საბჭოს მოწვევას, მათ ოფიციალურად მოიწერეს, რომ აქვთ უფლება, რომ როცა საჭიროდ ჩათვლიან, მაშინ მოიწვიონ საბჭო", - განაცხადა ლევან წულაიამ.

სწორედ მასზე გახორციელებულ ზეწოლას უკავშირებს ის, რომ ორგანიზაციაში ერთდროულად იმყოფება სახელმწიფო აუდიტი და ასევე მერიის აუდიტიც.

"ჩემი ძმის პოლიტიკური შეხედულების გამო ჩემზე წამოვიდა პოლიტიკური ზეწოლა და რამაც ორგანიზაცია დააზარალა. ვტოვებ თანამდებობას, აღმასრულებელი დირექტორის და მინდა წარმატებები ვუსურვო ორგანიზაციას", - განაცხადა წულაიამ.

მასთან ერთად თანამდებობა დატოვა პროდუქტის განვითარების მენეჯერმა მარიკა თოდუამ.

"ჩემზე არანაირი ზეწოლა არ იყო, თუმცა გული მწყდება, რომ ასეთი დასასრული აქვს ყველაფერს. ისეთი გეგმები გვქონდა და ბევრი ვიშრომეთ იმისთვის, რომ შედეგებიც მიგვეღო. მაგრამ იქ სადაც პოლიტიკაა, მე ვთვლი, რომ ჩემი ადგილი არ არის," - განაცხადა მარიკა თოდუამ.

დანიშნულების მართვის ორგანიზაცია გასული წლის 11 დეკემბერს, სამეგრელო-ზემო სვანეთის სახელმწიფო რწმუნებულის ადმინისტრაციის, ტურიზმის ეროვნული ადმინისტრაციის და USAID/Zrda-ს ინიციატივით შეიქმნა. ინტერმუნიციპალური ააიპ-ის თანამშრომლები სამეთვალყურეო საბჭომ შეარჩია, რომელიც დაკომპლექტებული იყო მუნიციპალიტეტების თანამდებობის პირებისა და კერძო სექტორისგან.

ლევან წულაია ორგანიზაციის აღმასრულებელ დირექტორად 2 წელია რაც მუშაობს, მანამდე ის სახელმწიფო რწმუნებულის ალექსანდრე მოწერელიას ადმინისტრაციაში აპარატის უფროსის თანამდებობას იკავებდა.

ლევან წულაიას მიერ გაკეთებული განცხადების შემდეგ "ლაივპრესმა" რწმუნებულის ადმინისტრაციას და ზუგდიდის მერიას მიმართა კითხვით ჰქონდა თუ არ ადგილი დანიშნულების მართვის ორგანიზაციის საქმიანობისთვის ხელშეშლას, თუმცა მერიაში განაცხადეს, რომ კომენტარს არ გააკეთებენ, რწმუნებულის ადმინისტრაციისგან კი პასუხი ჯერ არ მიგვიღია.