დანიშნულების მართვის ორგანიზაციის ხელმძღვანელ ლევან წულაიას განცხადებას, რომ მისი ძმის პოლიტიკური შეხედულების გამო, მასზე ზეწოლა ხდებოდა და ორგანიზაციას საქმიანობაში ხელი ეშლებოდა, ზუგდიდის მერის მოვალეობის შემსრულებელმა კონსტანტინე კაკავამ უპასუხა.

მისი თქმით, თავად ლევან წულაია არ თანამშრომლობდა მერიასთან.

"არც მას და არც სახელმწფო რწმუნებულს გიორგი გუგუჩიას ლევან წულაიასთან პოლიტიკაზე საუბარი არ ჰქონიათ, მათ შორის მხოლოდ საქმიანი კომუნიკაცია იყო. ამ ადამიანთან არც მე არც გუბერნატორს არ გვქონია პოლიტიკაზე საუბარი, ან საკადრო საკითხებზე, ჩემთვის გაუგებარია, რა ნაბიჯები გადადგა ამ ადმაიანმა, რაც შეეხება აუდიტორულ შემოწმებას, რომელზეც ის საუბრობს, 2020 წლის დეკემბერში დაიგეგმა ყველა იურიდიულ პირში, მათ შორის დანიშნულების მართვის ორგანიზაციაში აუდიტორიული შემოწმება, ეს არის გეგმიური შემოწმება. ჩვენ როგორც მუნიციპალიტეტის მერია ვალდებულები ვართ, ყველა ააიპი შევამოწმოთ, ხოლო ყველა ააიპ-ს ხელმძღვანელს აქვს ვალდებულება გაასაჯაროვოს თავისი ხარჯები, თუ ვინმე არ აკეთებს ამას, ეს არის არასწორი ნაბიჯი და რა მოტივით არ აკეთებს ამას. ესეც ჩემთვის გაუგებარია", - განაცხადა კონსტანტინე კაკავამ.

რაც შეეხება ლევან წულაიას ბრალდებას, რომ მერის მოვალეობის შემსრულებელმა არ მოიწვია სამეთვალყურეო საბჭო, კონსტანტინე კაკავას განცხადებით, საბჭოს სხდომა აუცილებლად ჩატარდებოდა.

"ჩვენ ამას ისედაც ვგეგმავდით რადგანაც ეწურებოდა შრომითი ხელშეკრულება ჩვენ აუცილებლად ვიმსჯელებდით მისთვის ხელშეკრულების გაგრძელების თაობაზე. ან თუ ისურვებდა სამსახურიდან წასვლას, ვიმჯედებდით ამ საკითხზე, ეს სხდომაც აუცილებლად ჩატარდება.

ჩვენ გვაქვს ინფორმაცია ინვესტიციების ხარჯვასთან დაკავშირებით, რომ არაჯეროვნად ხდებოდა მისი ათვისება, რის გამოც საერთაშორისო ორგანიზაციები გამოთქვამდნენ უკმაყოფილებასაც. თუმცა ეს არის შიდა მენეჯმენტის საკითხები და შეიძლება ეს არ გვეხება, მაგრამ როგორც დამფუძნებელი, რომელიც მას აძლევს გარკვეულ ფინანსურ ასიგნებებს, როგორც სხვა იურიდიული პრი, ისიც არის ვალდებული მუნიციპალიტეტის წინაშე და ის თანხები, რომელიც მუნიციპალიტეტის მხრიდან გაიცემა, არის ზუგდიდელი გადასახადების გადამხდელების თანხა და ნებისმიერი აუდიტორული დაკვნა არის გამჭვირვალე ყველასათვის.

სამწუხაროდ ამ ააიპ-ის ხემძღვანელმა არ ისურვა ჩვენთან თანამშრომლობა და დოკუმენტაციის წარმოდგენა", - განაცხადა კონსტანტინე კაკავამ.

დანიშნულების ადგილის მართვის ორგანიზაციის ხელმძღვანელ ლევან წულაიამ დღეს ჟურნალისტებთან ბრიფინგზე განაცხადა, რომ მისი ძმა ყოფილი პრემიერის, გიორგი გახარიას მხარდამჭერია, რის გამოც მასზე ზეწოლა ხორციელდება და ორგანიზაციის საქმიანობასაც ხელი ეშლება.