დღეს ჩვენ კიდევ ერთხელ ვიხილეთ "ნაციონალურო მოძრაობის" ძალადობრივი სახე, რომელმაც განახორციელა ფიზიკური და ფსიქოლოგიური ზეწოლა, შეტევა საოლქო საარჩევნო კომისიისა და მისი წევრების მიმართ, - ასე შეაფასა საოლქო საარჩევნო კომისიაში განვითარებული მოვლენები მმართველი პარტიის მერობის კანდიდატმა. მამუკა წოწერიას თქმით, დაზიანდა საარჩევნო კომისიის ინვენტარიც. მანვე აღნიშნა, რომ ეს აგრესია მე-11 მაჟორიტარული ოლქის ბათილი ბიულტენების გადათვლის შედეგმა განაპირობა, როცა ხმების უმრავლესობა მათ კანდიდატს დაემატა. პროცედურა, მამუკა წოწერიას მტკიცებით, საარჩევნო კანონდმდებლობის სრული დაცვით ჩატარდა.

"გადათვლის შედეგად ოპოზიციურ პარტიებსაც დაუფიქსირდათ მათ სასარგებლოდ შედეგები და მხოლოდ მას შემდეგ, რაც მათ საზიანოდ წამოვიდა კონკრეტული და რეალური ხმები, რომელიც იყო ყუთში და რომელიც აფიქსირებდა ნებას ჩვენი ამომრჩევლის, ეს გახლდათ მათი გაღიზიანებისა და პროტესტის მიზეზი. არცერთ მათგანს ხმის დათვლის პროცედურის დაწყებამდე ერთი პრეტენზიაც არ გამოუთქავამს, რომ კონვერტი იყო დარღვეული, ან ლუქის მთლიანობა იყო დარღვეული. როგორც მოგეხსენებათ, ამ პროცესს ესწრებოდნენ არასამთავრობო ორგანიზაციები, რომლებიც ასევე, სადამკვირვებლო მისიით არიან და არც მათგან ყოფილა რაიმე ეჭვი", - განაცხადა მერობის კანდიდატმა ბრიფინგზე.

ის დარწმუნებულია, რომ მეორე ტურში სწორედ თავად მოიპოვებენ გამარჯვებას. სჯერა, ამომრჩეველი გაცილებით უფრო მობილიზებული იქნება და ამასთან, მხარს დაუჭერენ ისინიც, რომელთათვისაც მიუღებელია მძიმე წარსულში დაბრუნება, მაგრამ სხვადასხვა მიზეზის გამო, პირველ ტურში ოპონენტებს გამოუცხადეს ნდობა.

მამუკა წოწერიას თქმით, საზოგადოებამ ძალადობაში, სიყალბესა და ცილისწამებაში გაწაფულ ძალას არ უნდა მიანდოს მიანდოს მართვის სადავეები, თუნდაც რომელიმე მუნიციპალურ ერთეულში. დარწმუნებულია, რომ ზუგდიდიც არ გახდება თანაზიარი, "კასტილიან მანიაკთან" ასოცირებულ ძალასთან.

"ღირსეულ პასუხს მიიღებენ 30 ოქტომბრის არჩევნებში და არც ზუგდიდის მოსახლეობა არ იქნება გამონაკლისი, რომელიც საბოლოოდ უარს ეტყვის მძიმე წარსულში დაბრუნებას და ორი ალტერნატივიდან განვითარებისა და პერსპეტქტივასა და მძიმე წარსულში დაბრუნებას შორის ღირსეულ არჩევანს გააკეთებს", - აღნიშნა მერობის კანდიდატმა.

ენმ ხვალ, 9 ოქტომბერს, ხმები დასაცავად საპროტესტო აქციას გამართავს. ნიკა მელიას მიერ დაანონსებულ შეკრებაზე აქტიური გამოსვლისკენ მოუოდა მოსახლეობას ექსპრეზიდენტმა მიხეილ სააკაშვილმა ციხიდან. მისი თქმით, საქართვლო გათავისუფლება ისევ სამეგრელოდან უნდა დაიწყოს.

ხმაურით ჩაიარა გუშინ საღამოს "ქართული ოცნების" საჩივრის განხილვამ ზუგდიდის საოლქო საარჩევნო კომისიაში. კერძოდ, სიტყვიერი დაპირისპირება მოჰყვა მე-11 მაჟორიტარულ ოლქში, ბათილი ბიულეტენების გადათვლის შედეგად, მმართველი პარტიის კანდიდატისთვის დამატებულ 12 ხმას, რომელიც ენმ-ის წარმომადგენელთან აგებდა ორი ხმით. ოპოზიცია ირწმუნება, რომ დალუქული კონვერტები, რომელიც საოლქო კომისიაში ინახება, გახსნეს და "ქართული ოცნების" სასარგებლოდ გადააკეთეს ხმები. დღეს კი, მათივე მტკიცებით, ბიულეტენების ოთახში, კონვერტებში ოლქის თავმჯდომარე იქექებოდა. ბრალდებებს მირანდა მესხი უარყოფს და დეზინფორმაციას უწოდებს.

ენმ-მ პროკურატურას მიმართა მომხდარის გამოძიების მოთხოვნით.