საქართველოს მესამე პრეზიდენტის, მიხეილ სააკაშვილის და სხვა "უკანონო პატიმრების" გათავისუფლების მოთხოვნით, სამეგრელო-ზემო სვანეთის სახელმწიფო რწმუნებულის ადმინისტრაციასთან "ერთიანი ნაციონალური მოძრაობის" მხარდამჭერებმა და სამოქალაქო აქტივისტებმა საპროტესტო აქცია-პერფორმანსი მოაწყვეს.

აქციის მონაწილეების ნაწილს ეცვა მაისურები, რომლებზეც ეწერა "მიხეილ სააკაშვილის საქმეზე" დაკავებული ფოთელი მამა-შვილის, წოწორიების და ასევე, პატიმრობაში მყოფი ყოფილი ძალოვნების, ხობის პოლიციის ყოფილი უფროსის ლექსო რაფავას და კუდის თბილისის სამმართველოს უფროსის ყოფილი მოადგილის, გიორგი დათიაშვილის სახელები და გვარები სოლიდარობის ნიშნად.

"თავისუფლება მიხეილ სააკაშვილს, თავისუფლება ლექსო რაფავას, თავისუფლება შალვა წოწორიას, თავისუფლება მერაბ წოწორიას, თავისუფლება გიორგი დათიაშვილს" - როგორც აქციის ერთერთმა მონაწილემ ირაკლი კვარაცხელიამ განაცხადა, ეს ადამიანები მათ დღეს სიმბოლურად ჩასვეს სკამებში, ხელისუფლებას კი ციხეში ჰყავს.

მისი სიტყვებით, უნდა დასრულდეს ხელისუფლება, რომელიც ყოფილ სამართალდამცავებს "იარაღს უდებს" და მზად არის საკუთარი მიზნებისთვის ყველა გზას მიმართოს.

"აქ არიან ახალგზარდები, ბავშვები, რომლებსაც ყელში ამოუვიდათ ის, რომ ქვეყანაში მუდმივად სჭირდებათ ბრძოლა დამოუკიდებლობისთვის, მუდმივად სჭირდებათ ბრძოლა სამართლიანისთვის. ჩვენ ეს ყველას მოგვბეზრდა და ამ ბრძოლას ახლა, ამ არჩევნებით მოვიყვანთ ბოლომდე და ამ არჩევნებით დავასრულებთ ამ ხელისუფლებას", - განაცხადა ირაკლი კვარაცხელიამ.

აქცია-პერფორმანსის დასასრულს შეკრებილებმა წარწერა "თავისუფლება მიშას" დატოვეს რწმუნებულის ადმინისტრაციის წინ, ტროტუარზე.

გუშინ, 25 ოქტომბერს, ყოფილი სამართადამცველის, ლექსო რაფავასთვის სოლიდარობის ნიშნად თანამდებობა დატოვა სამეგრელო-ზემო სვანეთის საპატრულო პოლიციის თანამშრომელმა, პოლიციის მაიორმა გიორგი ბერიშვილმა. რაფავა 21 ოქტომბერს დააკავეს. ენმ-ის განცხადებით, მას იარაღი "ჩაუდეს".

მანამდე,იგივე მიზეზით სამსახურიდან წავიდა სასაზღვრო პოლიციის სამეგრელო-ზემო სვანეთის სადგურ ანაკლიის უფროსი რევაზ ლაზიშვილი. 

"ერთიანი ნაციონალური მოძრაობის" წევრებმა, მათ შორის პარტიის ერთ-ერთმა ლიდერმა ნიკა მელიამ 22 ოქტომბერს გაავრცელეს ინფორმაცია, რომ სუს-ის 30 სპეცწარმომადგენელი თბილისიდან მივლენილია ზუგდიდში, რათა გამთენიისას ან შემდეგ დღეს დააკავონ ენმ-ის მხარდამჭერი ყოფილი სამართალდამცავები. სუსმა და პრემიერმა ღარიბაშვილმა ეს ბრალდებები უარყვეს. 

რაც შეეხებათ ფოთის პორტის თანამშრომელ მამა-შვილს, ისინი მიხეილ სააკაშვილის საქმეზე 4 ოქტომბერს დააკავეს. კუდის თბილისის სამმართველოს უფროსის ყოფილი მოადგილე გიორგი დათიაშვილი კი 20 ოქტომბერს.

ხვალ, 27 ოქტომბერს, ადგილობრივი მერიის წინ, ზუგდიდში აქცია - "ბრძოლა გამარჯვებისთვის, ბრძოლა მიშას თავისუფლებისთვის" გაიმართება. პარარელურად თბილისში გაიმართება "ქართული ოცნების" მხარდამჭერთა შემაჯამებელი შეკრება.