ამ წუთებში ზუგდიდში ენმ-ის ორგანიზებით საპროტესტო აქცია მიმდინარეობს სახელოწოდებით - "ბრძოლა გამარჯვებისთვის, ბრძოლა მიშას თავისუფლებისთვის". შეკრებილთა მთავარი მოთხოვნა საქართველოს მესამე პრეზიდენტის, მიხეილ სააკაშვილის გათავისუფლებაა, რომელიც მათი მტკიცებით, უკანონოდ დააკავეს. აქციაზე მონაწილეები საქართველოს დროშებით მივიდნენ. ამასთან, ყოფილმა ძალოვნებმა საქართველოს დროშა მუსიკის ფონზე შემოიტანეს.

აქცია გახსნა ყოფილმა ძალოვანმა ნიკო მიქაიამ. სწორედ ის მიმართავს ამ წუთებში შეკრებილებს. ნიკო მიქაია მიესალმა აქციის მონაწილეებს და ქვეყნის "მთავარსარდალ" მიხეილ სააკაშვილს. თქვა, რომ იბრძვიან იმისთვის, რომ ახალგაზრდებს ჰქონდეთ უკეთესი მომავალი, თავისუფალი ქვეყანა. ყოფილი ძალოვნის განცხადებით, არასდროს შეუსრულებიათ უკანონო დავალებები და მხოლოდ სახელმწიფოს ინტერესებით მოქმედებდნენ.

აქციის დაწყებამდე ჩართეს მიხეილ სააკაშვილის ერთ-ერთი ვიდეომიმართვა, რომელიც მის ფეისბუკ გვერდზე ადრე გავრცელდა. ამ ვიდეოში ყოფილი პრეზიდენტი
საუბრობს, რომ არის მის საყვარელ სამეგრელოში, რომელიც ძალიან ენატრებოდა.

მიხეილ სააკაშვილი საქართველოში 1-ელ ოქტომბერს დააკავეს. ის უკვე 27-ე დღეა შიმშილობს, რითაც აპროტესტებს მის პატიმრობას და თავისივე საქმეზე დაკავებული პირების დაპატირებას. დღეს სააკაშვილმა უარი თქვა შიმშილობასთან დაკავშირებული ყველანაირი მედიკამენტის მიღებაზე.

დღესვე თბილისში, "ქართულმა ოცნებამ" შემაჯამებელი შეკრება გამართა და არჩევნების მეორე ტურში გამარჯვება დააანონსა.

მიხეილ სააკაშვილი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. ასევე, მიხეილ სააკაშვილი ბრალდებულია "ტელეიმედი"-ს დარბევის, 7 ნოემბრის დარბევის და პატარკაციშვილების ქონების უკანონოდ დაუფლების და სახელმწიფო დაცვის სპეციალური სამსახურის კუთვნილი - 9 024 367 ლარის მისი პირადი მიზნებისთვის გაფლანგვის ფაქტებზე. აღნიშნულ საქმეებზე მიმდინარეობს განხილვა თბილისის საქალაქო სასამართლოში.

ზუგდიდში, ისევე როგორც კიდევ 19 ქალაქში მერი არჩევნების მეორე ტური გაიმართება. აქ ერთმანეთს "ქართული ოცნების" კანდიდატი მამუკა წოწერია და ენმ-ის წარმომადგენელი ანზორ მელია დაუპირისპირდებიან. მელიამ პირველ ტურში წოწერიაზე დაახლოებით 6%-იანი უპირატესობა მოიპოვა, თუმცა ვერ მიიღო ხმების 50%+1 ხმა, რის გამოც მეორე ტური დაინიშნა.