ხელისუფლება სამხედრო პირებს, რომლებიც სახელმწიფოს უნდა ემსახურებოდნენ "ქართული ოცნება" ვიწროპარტიული ინტერესებისთვის იყენებს. განაცხადა ენმ-ის ოფისში გამართულ ბრიფინგზე ანა წითლიძემ. პარლამენტარის ინფორმაციით, ამის ერთ-ერთი მაგალითია ის, რომ სენაკის მე-2 ბრიგადის ბატალიონების შემადგენლობა იძულებით მიიყვანეს მმართველი პარტიის აქციაზე.

ამასთან, მისი ცნობით, ორი დღის წინ ზუგდიდში ქართული ოცნების შტაბში იმყოფებოდნენ დასავლეთ ოპერატიული დაჯგუფების სარდალი, გენერალი კობა გრიგოლია და სენაკის მე-2 ბრიგადის მეთაური ირაკლი ჭითანავა. წითლიძის განმარტებით, ეს ადამიანები ახორციელებენ ზეწოლას სამხედროებზე და მათგან ითხოვენ კოორდინატორის ფუნქციების შეთავსებას.

ოპოზიციურ პარტიაში ამბობენ, რომ თავდაცვის სამინისტროს ეროვნული გვარდიის უფროსის მოადგილე, კობა ახვლედიანი, სუსის დავალებით მონაწილეობს არჩევნების გაყალბების პროცესში. წითლიძის მტკიცებით, ის იმყოფებოდა ზუგდიდში აშინებდა იძულებით გადაადგილებულ პირებს და განაგრძობს მათთვის პირადობის მოწმობების ჩამორთმევას.

ენმ-ის განცხადებით, ზუგდიდში არჩევნების გასაყალბებლად გამოგზავნეს სუსის ახალი ჯგუფები და სუსის წარმომადგენლები თბილისიდან, გორიდან და ბორჯომიდან. ისინი ზუგდიდის სასტუმროებში გადაანაწილეს კონკრეტული დავალებების მოლოდინში.

ანა წითლიძის ცნობით, ჭითაწყარში, ცაიში, ურთაში ე.წ. "კარგი ბიჭი", მეტსახელად "საჯო", მმართველი პარტიის აქტივისტის, გამგებლის ყოფილი მოადგილის, გიზო სართანიას დავალებით, საავადმყოფოს უბანსა და ჭითაწყარში ახალგაზრდებს აშინებს და მათ ჰპირდება პრობაციის მოხსნას, ან შემცირებას და მართვის მოწმობების გაკეთებას, მმართველი პარტიისთვის ხმის მიცემის სანაცვლოდ.

მისივე თქმით, დაშინების და გაყალბების პროცესი მონაწილეობს ფოთში დაცვის პოლიციის თანამშრომელი შოთა წიწავა და ზუგდიდის მე-2 სამმართველოს ყოფილი უფროსის მოადგილე. ისინი ემუქრებიან მოსახლეობას სოციალური დახმარების შეწყვეტით ჭთაწყარში, ცაიშსა და ურთაში.

ჩამონათვალში მოხვდა ინგირში აღმოსავლური ორთაბრძოლის სკოლის ხელმძღვანელი ბაჩუკი ფარცვანია. წითლიძე ამბობს, რომ ის სუსის მართულ ე.წ. კარგ ბიჭ ბადრი გუგუჩიასთან და გელა ქობალიასთან ერთად, კანონიერი ქურდის, ირაკლი ყალიჩავას სახელით აშინებენ მოქალაქეებს ინგრიში და ზუგდიდის ქვედა ზონის დაბალ სოფლებში.

"ესენი არიან ადამიანები, რომლებიც ბოლო ორი დღეა ჩართულები არიან პირადობის მოწმობების ჩამორთმევაში, მოქალაქეთა დაშინებაში. ეს ადამიანები ცდილობენ შეუქმნან მოქალაქეებს განწყობა, რომ ისინი აკონტროლებენ მათ არჩევანს, იმისთვის, რომ მათი აქტივობა მეორე ტურში იყოს ძალიან დაბალი", - აცხადებს ანა წითლიძე.

მისივე თქმით, განცხადებით უკვე მიმართა პოლიციას და პროკურატურას, ამ ადამიანების წინააღმდეგ მოკვლევის დაწყების მოთხოვნით.

მანვე დღევანდელ ბრიფინგზე აღნიშნა, რომ საქართველოს ხელისუფლების მოლაპარაკებით რუს ოკუპანტებთან და "ენგურჰესის" დირექტორის, ლევან მებონიას დავალებით, ჩაიკეტა ენგურის ხიდი და დევნილთა ნაწილს არ ეძლევა საშუალება არჩევნების მეორე ტურში მონაწილეობის, რაზეც რამდენიმე დღის წინ გამართულ ბრიფინგზე საუბრობდა. თუმცა, ენმ-ის წარმომადგენლის განმარტებით, თადარიგი დაიჭირეს და იძულებით გადაადგილებული პირები წინა დღეებში გადმოვიდნენ ზუგდიდში და ისინი 30 ოქტომბრის არჩევნებში მონაწილეობას მიიღებენ.