ბერების ნაწილის გამოკითხვა დასრულდა მარტვილის პოლიციის სამმართველოში. ოთხმა მათგანმა განყოფილება უკვე დატოვა. მამა პეტრე ღუდუშაური იხსენებს დილით განვითარებულ მოვლენებს და ამბობს, რომ სულ შვიდნი გადაიყვანეს პოლიციაში.

სასულიერო პირის თქმით, დილაადრიან, ექვსსაათანი ლოცვისას, სალხინოს მონასტრის ბერებმა შეატყობინეს, რომ ჩოხოსნებმა კელიებიდან გამოყარეს. ჩავიდნენ მონასტერში ვითარების ადგილზე გასარკვევად, სადაც პოლიცია დახვდათ და ეზოში შესვის უფლება არ მისცეს.

"მონასტერში ჩოხოსნები იყვნენ. კარები ჰქონდათ ჩაკეტილი. ჩვენ შიგნით გვინდოდა შესვლა და გვეუბნებოდნენ , რომ დაგვეტოვებინა მონასტერი. არ დავთანხმდით იმიტომ, რომ საპატრიარქოსთან გვაქვს მიწერილი წერილი, რომ მეუფე სტეფანეს არა აქვს უფლება ბერი დაიყვანოს ერისკაცობამდე, ეკლესიის სასამართლოს გარეშე. საქართველოს ეკლესიას სასამართლო არა აქვს, გაუქმებულია. ამიტომ ჩვენ არ დავტოვეთ მონასტერი მეუფე სტეფანეს მოწოდებით, ვითხოვდით სინოდს და თუ ეთანხმებოდნენ დავტოვებდით, გადავაბარებდით მშვიდობით. მაგრამ რა ვნახეთ, დილის ექვს საათზე მეუფე სტეფანე თავის რაზმთან, ჩოხიანებთან ერთად დაგვესხა თავს და ყველა გამოგვყარეს გარეთ. ამასობაში ჩვენც გაუწიეთ წინააღმდეგობა. პოლიციამ ჩვენი მხარე, ჩვენ, ბერები დაგვიჭირა", - იხსენებს სასულიერო პირი.

ორი დაკავებული ბერის, მამა დანიელ და მამა ბასილ გვილავების ადვოკატის, ლაშა ხოშტარიას განცხადებით, მისი დაცვის ქვეშ მყოოფებს სამართალდამცველებისთვის დაუმორჩილებლობას ედავებიან და ადმინისტრაციული წესით დააკავეს.

შსს-ში კი ამბობენ, რომ ინციდენტში მონაწილე პირები პოლიციაში გამოსაკითხად გადაიყვანეს.

სალხინოს მონასტრიდან დილაადრიან პოლიციის დახმარებით გააძევეს ეპარქიის მღვდელმთავრის მიერ განკვეთილი სასულიერო პირები. რამდენიმე მათგანი პოლიციის განყოფილებაში გადაიყვანეს.

მანამდე, ამ სასულიერო პირებმა ჭყონდიდის ეპარქიიდან მიიღეს წერილი, რომლის თანახმადაც, როგორც განკვეთილ პირებს, ტაძარი უნდა დაეტოვებინათ, საამისოდ კი ვადა 4 ნოემბრამდე განესაზღვრათ.

მარტვილში, სასულიერო პირებს შორის დაპირისპირება 2019 წლიდან დაიწყო, მას შემდეგ რაც ეპარქიის ყოფილი წინამძღვარი პეტრე ცაავა საპატრიარქომ მღვდელმთვრობიდან გაათავისუფლა. მეუფე პეტრე ცაავას მხარდამჭერები უარს ამბობენ დაემორჩილონ საპატრიარქოს მიერ მივლენილ ეპისკოპოსს და ითხოვენ საერთო კრებაზე განიხილონ პატრიარქის მისამართით პეტრე ცაავას მიერ გამოთქმული ბრალდებები, რის გამოც ის დაითხოვეს.