მარტვილში, სალხინოს მამათა მონასტერთან დღეს ისევ შეიკრიბნენ განკვეთილი და კელიებიდან გამოძევებული სასულიერო პირები და მრევლის ნაწილი. მათი მოთხოვნაა კითხვებზე პასუხი, თუ რატომ ვერ შედიან ტაძარში.

ბერის, დანიელ გვილავას თქმით, ისინი საპროტესტო აქციებს მომდევნო დღეებშიც გამართავენ. ამბობს, რომ ჭყონდიდის მიტროპოლიტის არჩევნების წინა დღეებში გამოსვლა პოლიტიკური დაკვეთა იყო და დღესაც, რაც ხდება პოლიტიკური დაკვეთის ნაწილია, რომელსაც ხელისუფლება მას უსრულებს.

"მრევლი არის მოწყურებული ქრისტიანობას, ქრისტიანი ადამიანი არის მებრძოლი და ჩვენ ამას არ დავთმობთ, არ მოვეშვებით. დღეს თუ არა ხვალ, ჩვენსას მივაღწევთ. სტეფანე არის ურწმუნო ადამიანი. ჩვენ ვითხოვთ მორწმუნე მეუფეს, რომელიც ძალიან ნაკლებად არის ჩვენს საპატრიარქოში. ელემენტარული მორწმუნეები არ არიან. რას ნიშნავს, 500 ადამიანი გარეთ ელოდება, თვითონნ სალოცავად შევიდა. ეს არის ქრისტიანობა, მწყემსი გამოვიდეს და პასუხი გაგვცეს ამ მშიერ ხალხს, ხორციელად და სულიერად მშიერ ხალხს", - განაცხადა სასულიერო პირმა.

მისი თქმით, წაჩხურუს მონასტერი იგივეს ვერ იზამენ, რადგან ის არ არის საპატრიარქოს ბალანსზე და არის სასაფლაოს ტერიტორიაზე. მამა დანიელის ინფორმაციით,
ორი კელია უკანონო მშენებლობას წარმოადგენს.

"ერთი ვარიანტია, მთავრობა მოვიდეს და დაგვინგრიოს. ჩემი პირველი მიზანი არის ამ ეკლესიას ფარდა ჩამოვხადო, ხალხს დავანახოთ, თუ რას წარმოადგენს ჩვენი ეკლესია. თორემ, მე რომ გარეთ დავრჩე, ეს არ არის ბერია დაღუპვა, პირიქით, ბერები ტყეში ცხოვრობენ", - აღნიშნა მან.

სალხინოს მონასტრიდან გუშინ, დილაადრიან პოლიციის დახმარებით გააძევეს ეპარქიის მღვდელმთავრის მიერ განკვეთილი სასულიერო პირები. 7 მათგანი პოლიციის განყოფილებაში გადაიყვანეს.

მანამდე, ამ სასულიერო პირებმა ჭყონდიდის ეპარქიიდან მიიღეს წერილი, რომლის თანახმადაც, როგორც განკვეთილ პირებს, ტაძარი 4 ნოემბრამდე უნდა დაეტოვებინათ.

ჭყონდიდის მიტროპოლიტ სტეფანეს განცხადებით, პოლიციის და ჩოხოსნების მხრიდან ძალადობა არ ყოფილა, ძალადობა იყო სწორედ განკვეთილი სასულიერო პირების მხრიდან.

მარტვილში, სასულიერო პირებს შორის დაპირისპირება 2019 წლიდან დაიწყო, მას შემდეგ რაც ეპარქიის ყოფილი წინამძღვარი პეტრე ცაავა საპატრიარქომ მღვდელმთვრობიდან გაათავისუფლა. მეუფე პეტრე ცაავას მხარდამჭერები უარს ამბობენ დაემორჩილონ საპატრიარქოს მიერ მივლენილ ეპისკოპოსს და ითხოვენ საერთო კრებაზე განიხილონ პატრიარქის მისამართით პეტრე ცაავას მიერ გამოთქმული ის ბრალდებები, რის გამოც ის დაითხოვეს.