აფხაზეთის დე ფაქტო სასაზღვრო სამსახურის თანამშრომლები კერძო საუბრებში ამბობდნენ, რომ "საზღვრის" ჩაკეტვის გადაწყვეტილება თბილისის თხოვნით მიიღეს, - აცხადებს "დემოკრატიის კვლევის ინსტიტუტი" გავრცელებულ ინფორმაციაში სათაურით - "არჩევნების ტყვეობაში: გალელები თბილისსა და სოხუმს შორის".

მათი თქმით, გალის მაცხოვრებლებს ეთნიკური კუთვნილება არასანდო მოქალაქეებად აქცევს აფხაზეთის დე ფაქტო მთავრობისთვის, ხოლო "არასასურველი" პოლიტიკური აქტიურობა - საქართველოს ცენტრალური ხელისუფლებისთვის, რაც განსაკუთრებით ცხადად ადგილობრივი თვითმმართველობის არჩევნების დროს გამოჩნდა.

ორგანიზაცია განმარტავს, რომ წინასაარჩევნო პერიოდში დაძაბულობა იყო ენგურის ორივე მხარეს, რაც განსაკუთრებით საგანგაშო სწორედ მეორე ტურის წინ გახდა. გალელებმა, რომლებიც სხვადასხვა მიზნით გადმოდიან თბილისის მიერ კონტროლირებად ტერიტორიაზე, აღმოაჩინეს, რომ ენგურის ხიდი ჩაკეტილია. სოხუმმა თქვა, რომ ამ გადაწყვეტილების საფუძველი ეპიდვითარება იყო, თუმცა ბევრი გალელის აზრით, ეს მოქმედება არჩევნებს უკავშირდებოდა.

არასამთავრობოს შეფასებით, ამ მოსაზრებას აძლიერებს ისიც, რომ ვირუსის გავრცელების კუთხით სიტუაცია არ დასტაბილურებულა, ამის მიუხედავად კი, ენგურის გამშვები პუნქტი 1 ნოემბრიდან ოფიციალურად გაიხსნა.

"დემოკრატიის კვლევის ინსტიტუტის ხელთ არსებული ინფორმაციით, აფხაზეთის დე ფაქტო სასაზღვრო სამსახურის თანამშრომლები კერძო საუბრებში ამბობდნენ, რომ "საზღვრის" ჩაკეტვის გადაწყვეტილება თბილისის თხოვნით მიიღეს.

ცენტრალური ხელისუფლების მიერ კონტროლირებად ტერიტორიაზე საჯარო სერვისების მისაღებად, ბევრი გალელი ზუგდიდშია რეგისტრირებული. ზუგდიდში რეგისტრაცია მათ შესაძლებლობას აძლევს, ჩართულები იყვნენ პოლიტიკურ პროცესებში და თავისი სამოქალაქო და პოლიტიკური უფლებები გამოიყენონ. გალის რეგიონის მოსახლეობის ამა თუ იმ ქართული პოლიტიკური პარტიის მიმართ ლოიალობის თაობაზე მსჯელობა რთულია. ამის მიუხედავად, გალში ვარაუდობენ, რომ ცენტრალური ხელისუფლების გარკვეულ წრეებში, გალელების პოლიტიკური აქტივობა საფრთხედ იქნა აღქმული ზუგდიდში ოპოზიციური ძალების შესაძლო უპირატესობის მოპოვების შიშით. შესაძლოა, სწორედ ამის გამო გაჩნდა მოსაზრება, დაკეტილი "საზღვრით" შეეშალათ ხელი სავარაუდოდ, ოპოზიციურად განწყობილი ამომრჩევლის მობილიზებისთვის.

ამ მოსაზრებას აძლიერებს ინფორმაცია იმის შესახებ, რომ მმართველი პარტიის მხარდამჭერები გალის რეგიონის მაცხოვრებლებს საქართველოს პირადობის დამადასტურებელი მოწმობების გადაცემას სთხოვდნენ. თუმცა, იმ პირების უმეტესობამ, ვისაც მსგავსი თხოვნით მიმართეს, პირადობის დამადასტურებელი მოწმობების გადაცემაზე უარი თქვა. დემოკრატიის კვლევის ინსტიტუტის ინფორმაციით, ამ პროცესში აქტიურად იყვნენ ჩართულები კრიმინალური წარსულით ცნობილი პირები, რომლებიც თავისუფლად გადაადგილდებოდნენ გალსა და მის სოფლებში", - ვკითხულობთ განცხადებაში.

არასამთავრობო ორგანიზაციაში ამბობენ, რომ საქართველოს კანონმდებლობა არჩევნებში, რეფერენდუმში, ან პლებისციტში ნების განხორციელებისთვის ხელის შეშლას სისხლის სამართლის დანაშაულად მიიჩნევს. ენგურის ხიდის ჩაკეტვით, გალელებისთვის ადგილობრივი თვითმმართველობის არჩევნებში მონაწილეობისთვის ხელოვნურად ხელის შეშლა კი საგანგაშოა და საჭიროებს საქართველოს ცენტრალური ხელისუფლების მხრიდან სათანადო განმარტებას - ვინ და რატომ შეუშალა ხელი გალის რეგიონის მცხოვრებლების გადაადგილების თავისუფლებას არჩევნების პერიოდში.

უფრო ადრე, სწორედ 30 ოქტომბრის არჩევნებს დაუკავშირა ენმ ხიდის ცალმხრივად ჩაკეტვა. მათი ინფორმაციით, "ქართული ოცნების" დავალებით, "ენგურჰესის" დირექტორმა ლევან მებონიამ ოკუპანტებთან მოლაპარკება აწარმოა ხიდის ჩაკეტვაზე, რადგან გალელების უმრავლესობა ოპოზციური პარტიის ამომრჩეველია და რომ მათ არ შეძლებოდათ არჩევნებში მონაწილეობა.

ბრალდებები კატეგორიულად უარყო ლევან მებონიამ. მაშინ განცხადება "ენგურჰესის" სახელითაც გავცელდა.

ენგურის ხიდი არჩევნების პირველი ტურის წინაც ჩაიკეტა. მაშინ განცხადება დე ფაქტო სუსს არ გაუვრცელებია. მათ მხოლოდ 28 ოქტომბერს, მეორე ტურის წინ გაავრცელეს ინფორმაცია ხიდის ჩაკეტვაზე, მიზეზად კი ეპიდვითარება დაასახელეს.