ექსპრეზიდენტ მიხეილ სააკაშვილის დედა, გიული ალასანია ამბობს, რომ სალომე ზურაბიშვილის დღევანდელმა განცხადება, სადაც ის პატიმრის სამოქალაქო კლინიკაში გადაყვანაზე საუბრობს, მისთვის იმედისმომცემია.

"მომეჩვენა, რომ მკაფიოდ არ იყო ნათქვამი, მაგრამ აქეთ მივდივართ, როგორც ჩანს. მე გამიჩინა იმედი ქალბატონი სალომეს დღევანდელმა გამოსვლამ. აშკარად გამიჩინა იმედი იმიტომ, რომ თქვა, პროცესი უნდა იყოს საჯარო, გამჭვირვალე... ლაპარაკი იყო იმაზე, რომ ფოკუსში უნდა იყოს ჯანმრთელობა...

პრეზიდენტი რამდენიმე დღე არ იყო საქართველოში, შეიძლება გარედან ეს პროცესი სხვანაირად იყო შეფასებული მისგანაც. ფაქტია, რომ რაღაც შეიცვალა", - უთხრა გიული ალასანიამ "მთავარ არხს".

მანამდე სალომე ზურაბიშვილმა პრეზიდენტის ადმინისტრაციაცი ბრიფინგი გამართა, სადაც თქვა, რომ პენიტენციური სამსახურის მიერ გავრცელებული კადრები ღირსების და პატივის შემლახველია. მანვე ისაუბრა პატიმრის სამოქალაქო კლინიკაში გადაყვანის შესაძლებლობასა და რისკებზე და აღნიშნა, რომ მიხეილ სააკაშვილი არ არის რიგითი პატიმარი, და რომ ყოფილი პრეზიდენტის ჯანმრთელობა უნდა იყოს განსაკუთრებული ყურადღების ქვეშ.

მიხეილ სააკაშვილი თბილისში 1-ელ ოქტომბერს დააკავეს. ის 48-ე დღეა პროტესტის ნიშნად შიმშილობს. სოლიდარობის ნიშნად, მისი გლდანის სამკურნალო დაწესებულებიდან სამოქალაქო საავადმყოფოში გადაყვანის მოთხოვნით პარლამენტის თუ საკრებულოს დეპუტატები თბილისსა და სხვა ქალაქებში შიმშილობენ. მათ შორის ზუგდიდში.