ოპოზიცია ხვალ, თბილისში, სამ ლოკაციაზე დაგეგმილ მანიფესტაცია-მსვლელობას აუქმებს და მოქალაქეებს 3 საათზე, რესპუბლიკის მოედანზე შეკრბისკენ მოუწოდებს. ამის შესახებ ბრიფინგზე ენმ-ის თავმჯდომარე ნიკა მელიამ განაცხადა და მიხეილ სააკაშვილთან დაკავშირებულ გარემოებებზე ისაუბრა. მან მოუწოდა ყველას, ვისაც სჯერა, რომ შიმშილობა შიმშილობაა და არა დიეტა, რომ ამ ყველაფერში თავიდან ბოლომდე ჩართულია რუსეთის სპეცსამსახურები, ვისაც სჯერა, რომ ქვეყნის მესამე პრეზიდენტს არ უნდა კლავდნენ, რომ ქვეყნის თავისუფლება და ღირსება არის ძალიან სერიოზული საფრთხის ქვეშ, აუცილებლად შეიკრიბონ და პროტესტი გამოხატონ.

"სადისტური რეჟიმი მოქმედებაშია. სადისტური რეჟიმი არ ავლენს ელემენტარულ ადამიანურ ნიშნებსაც კი და ცდილობს სისრულეში მოიყვანოს ამ ქვეყნისთვის დამღუპველი გეგმა და უარს არ ამბობს მანიაკალურ სურვილზე, არც მეტი და არც ნაკლები, დატყვევებული ადამიანი მოკლას. მოკლას არა საავადმყოფოში, არა ციხეში, არამედ იქ, სადაც მოისურვა ბიძინა ივანიშვილმა. ის არც ციხეა და არც საავადმყოფო. ის არის უბრალოდ რაღაც შენობა, სადაც დატყვევებული ჰყავს ადამიანი. არ აიღო ხელი ამ მანიაკალურ სურვილზე ბიძინა ივანიშვილმა. მათ შორის, არ შეისმინა ყველაზე კომპეტენტური ექიმების რჩევები. არც მათ მიერ გაკეთებული მძიმე პროგნოზები", - აღნიშნა ნიკა მელიამ.

დღეს საღამოს მიხეილ სააკაშვილის ადვოკატმა ბექა ბასილაიამ განაცხადა, რომ მესამე პრეზიდენტი ცუდად გახდა, "მოხლეტით დაეცა" და საკაცით გაიყვანეს.

ექიმ-რეანიმატოლოგის ინფორმაციით, რომელიც პაციენტთან იმყოფებოდა, მისი მდგომარეობა უკვე სტაბილუია და სააკაშვილი კონტაქტურია.

ამ წუთებში გლდანის ციხესთან მოქალაქეები არიან შეკრებილი. ადგილზე მობილიზებულია პოლიციაც.

49-ე დღე სრულდება, რაც მიხეილ სააკაშვილი შიმშილობს. ის თბილისში 1-ელ ოქტომბერს დააკავეს.

სახალხო დამცველის მიერ შექმნილმა ექსპერტთა ჯგუფმა საქართველოს მესამე პრეზიდენტის ჯანმრთელობის მდგომარეობასთან დაკავშირებით დასკვნა გამოაქვეყნა.

ექსპერტთა ჯგუფი მიიჩნევს, რომ პაციენტის მდგომარეობის კრიტიკულობიდან გამომდინარე, მისი მკურნალობის გაგრძელება დაუყოვნებლივ რეკომენდებული იყო ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.