მოშიმშილე ელენე ხოშტარია უარს ამბობს დღეიდან მედიკამენტების მიღებაზეც. ამის შესახებ ის "ფეისბუკის" გვერდზე წერს. ამბობს, რომ მთელი ღამე ელოდებოდა ექსპრეზიდენტ მიხეილ სააკაშვილის გადაყვანას მრავალპროფილურ კლინიკაში, ამდენი ექიმის რეკომენდაციის და პანიკის შემდეგ. თუმცა უშედეგოდ.

"საბოლოო ჯამში, ღამიდან დავასკვენი, რომ იმ დროს, როცა სააკაშვილის თავში და არამარტო, მიდის საშიში პროცესები და კრიტიკულ რამდენიმე საათში გამოკვლეულიც კი არ არის ბოლომდე.

დრო არათუ აღარაა, შეიძლება დაგვიანებულია.

ამიტომ, მე გადავწყვიტე, რომ ვაჩერებ მედიკამენტოზურ მკურნალობას კრიტიკული მაჩვენებლების წინააღმდეგ და სანამ არ გადაიყვანენ არაფერს არ გადავისხამ და არ მივიღებ.

მე სხვა გზა არ მაქვს. ვერ ვიჯდები უმოქმედოდ გადამწყვეტ წუთებში.

გადაიყვანეთ სააკაშვილი კლინიკაში სასწრფოდ!", - აცხადებს "დროას" ხელმძღვანელი.

ელენე ხოშტარია მე-17 დღეა შიმშილობს ერთადერთი მოთხოვნით, გადაიყვანონ ყოფილი პრეზიდენტი სამოქალაქო კლინიკაში, სადაც შესაბამის სამედიცინო სერვისს მიიღებს.

მიხეილ სააკაშვილი 50-ე დღეა შიმშილობს. გუშინ საღამოს მან ადვოკატებთან შეხვედრისას გონება დაკარგა. ამის შესახებ საზგადოებას მისმა უფლებადამცველმა ბექა ბასილაიამ განუცხადა. მოგვიანებით, პენიტენციურმა სამსახურმა თქვა, რომ მესამე პრეზიდენტის მდგომარეობა სტაბილური გახდა. ექიმ-რეანიმატოლოგმა კი აღნიშნა, რომ პაციენტი კოტაქტურია, და რომ ეს იყო მცირე ხნით გონების დაკარგვა. მიზეზი კი სრულყოფილი გამოკვლევის შემდეგ დადგინდება.

სახალხო დამცველის მიერ შექმნილმა ექსპერტთა ჯგუფმა საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებით დასკვნა ორი დღის წინ გამოაქვეყნა.

ექსპერტთა ჯგუფი მიიჩნევს, რომ პაციენტის მდგომარეობის კრიტიკულობიდან გამომდინარე, მისი მკურნალობის გაგრძელება დაუყოვნებლივ რეკომენდებული იყო ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, კერძოდ ინტენსიური თერაპიის განყოფილებაში, რის პირობებსაც მე-18 დაწესებულების კლინიკა არ აკმაყოფილებს.